[A:142b]la sher phyin gsungs sa grong khyer spos ldan te/ rgya skad du shin tu hu zhes pa rnams gzigs/ de nas dgung lo so drug pa la gong ma rgyal pos gnang sbyin chen po mdzad/ 'phags pa ti shrI'i dbon po yin nges su 'dug pas/ khyed kyi rigs brgyud spel la sa skyar gdan sa gyis gsungs pa'i lung dang 'ja' sa bzang po gnang ste/ rgyal po'i bka' bzhin myur bar gdan bteg nas/ dgung lo so bdun pa sa pho khyi'i lo la gdan sa chen por phebs/ de dus shar pa 'jam dbyangs chen po gzhi thog na bzhugs pas/ bdag nyid chen po la gdan sa gtad/ 'on kyang rang nyid thugs gnyer gsan sbyong gi stabs dang / cung zad mi mdzes pa la dgongs nas gong nas gdung brgyud spel ba dang / gdan sa mdzad dgos pa'i lung yod kyang re zhig lha khang bla brang du bzhugs nas 'chad nyan sogs gdan sa'i mthil rang ma mdzad par/ shar pa 'jam dbyangs rin rgyal bas bdag nyid chen po zhe lngar phebs kyi bar mdzad/ de ltar dharma pA la bdag nyid chen po dgung lo nyer bdun pa la gshegs pa'i nyer brgyad pa nas/ zhe lnga'i bar lo bco brgyad kyi bar la gdan sa shar pas mdzad pas/ dus phyis kyi bar du yang shar pa'i bla ma khri 'don grub pa rnams tshogs kyi dpon sogs mdzad pa'i tshe/ bdag nyid chen po sa paN gyi chos khri chen mo 'di'i steng du byon chog pa'i rgyu mtshan yang de yin no zhes grags so/ /de nas bla ma bdag nyid chen po 'dis yab mes kyi chos ma lus pa thugs su chud nas/ dgung lo zhe lnga pa la gdan sa'i khur chen po bzhes/ gzhi thog gi go sar byon te