[A:148b]bdag nyid chen po 'phags pa blo gros rgyal mtshan dang rnam thar mtshungs pa yin no zhes bshad pas/ skal ldan blo gsal rnams kyis gong du bstan pa'i 'phags pa'i rnam thar lta bu 'di la yang mnga' bar shes par bya'o/ /de lta bu'i bla ma de nyid zhing 'di bas zhing khams gzhan du 'gro ba'i don rgya che ba la dgongs nas/ dgung lo nyi shu rtsa dgu pa me mo yos kyi lo me tog ra ba zhes bya ba chos rgyal 'phags pa'i gdan sa che ba gsum gyi nang tshan gyi gnas mchog de nyid du ngo mtshar ba'i ltas du ma dang bcas te zhi bar gshegs so/ /'dir bla ma dam pa'i dngos slob shes rab rdo rje'i gdung rabs las dgung lo bcu drug pa la gong du byon nas/ nyer lnga pa la bsnyen rdzogs mdzad/ nyer dgu pa la sku gshegs par bshad mod kyang / ti shrI gdan rabs las/ bla ma 'dis rgyal po'i ti shrI lo bcu drug tsam mdzad ces 'byung ba ltar na dgung lo bcu drug pa nas/ nyer dgu'i bar la lo bcu drug mi longs pa mngon sum du grub pas cung zad brtag par bya'o/ /yang 'dir cung zad dpyad dgos pa'i dogs pa ni/ gtsang byams pa'i gdung rabs las/ bdag nyid chen po yan chad la sa skya spyi la dbang ba'i gdung rabs dang / de'i sras rnams la so sor dbang bsgyur ba'i gdung rabs zhes bshad pa ltar de bzhin yin pa yongs la grags mod/ de ltar na ti shrI kun blos rang gi gcung rnams la bla brang rnams bgos nas gnang bar bshad pas/ de yan du bla brang go bzhir gyes pa de ma byung la/ go bzhir gyes pa ti shrI kun blo'i gcung rnams nas byung bas na/ de phyin chad kyi gdung