[A:148a]bstan bcos la sogs pa mang du nod de thugs su chud par mdzad/ de ltar dbus gtsang gi skye bo rnams la chos dang zang zing gi sbyin gtong rgya chen po dang / khyad par bla ma 'di nyid kyis gong du rgyal po chen po la zhus nas/ dbus gtsang rnams la khral med pa yang lo du ma mdzad de/ gangs can gyi skye bo rnams bde ba la bkod nas/ de nas dgung lo nyer drug pa byi ba'i lo la yab bdag nyid chen po sku gshegs pa na/ gcung rnams la bla brang rnams bgos nas gnang ste/ de yang bla ma mkhas btsun pa sku mched la shel gyi dam kha dang gzhi thog bla brang gnang / ti shrI legs 'byung sku mched la gser gyi dam kha dang lha khang bla brang gnang / 'jam dbyangs don yod rgyal mtshan sku mched la shel gyi dam kha dang rin chen sgang bla brang gnang / dbang kun dga' legs pa lcam sring la gser gyi dam kha dang dus mchod bla brang gnang ste/ slar yang gong nas spyan 'dren pa'i pho nya mngags pa'i ngor shar phyogs la phebs te/ de'i tshe yang rgyal po sras dang btsun mo dang blon po'i tshogs dang bcas pas/ rol mo la sogs pa bkod pa'i khyad par du ma dang bcas pas pho brang du gdan drangs nas zab pa dang rgya che ba'i chos kyi tshul du ma stsal te/ rgyal bstan me tog kunda'i tshal rgyas pa la zla ba'i 'od zer phog pa ltar ches cher gsal bar mdzad pa yin la/ de dag ni bla ma 'di'i rnam thar cha tsam yin zhing / rgyas par ni rgya'i yig tshang du bla ma dang rgyal po gang byon pa thams cad kyi mdzad spyod 'phral la yi ger 'debs bas/ de'i lugs ltar na bla ma 'di dang