[A:150b]ma/ ming dge 'dun 'bum du grags pa zhig khab tu bzhes pa la/ sras bla ma chen po ta dben kun dga' rin chen zhes bya ba 'khrungs te rang gi khu bo bla ma dam pa dang bla ma mnyam med chen po gnyis las rab tu byung zhing / de gnyis dang zhang dbang phyug rgyal mtshan pa gnyis bsten nas bde kye sogs kyi dbang bka' mang du gsan/ gzhan slob dpon mgon rgyal pa'i drung du rtsa rgyud brtag gnyis bslab ste gdan sar nang du gsungs/ mkhan chen rtogs ldan dang slob dpon 'jam sngon du grags pa la rnam 'grel dang rigs gter bslab ste shin tu mkhas par mkhyen yang / dus kyi shugs kyis re zhig dbus phyogs su phebs dgos byung nas/ rtse thang sogs su 'chad nyan dang gzigs rtog sogs mdzad pa'i ngang nas lug lo ta'i si tu byang rgyal gyi chag phyi mdzad nas chu mig tu phebs te der brtag gnyis/ rnam 'grel/ rigs gter/ thub pa dgongs gsal la sogs pa chos mang du gsungs/ de nas bzung ste bdag chen blo gros dbang phyug pa'i bar du gzhi thog pa'i gdung brgyud rnams kyi chu mig tu chos 'khor mang du bskor/ 'ga' zhig gdan chags pa yang mdzad pas gzhi thog bla brang pa'i gdung brgyud rnams la phyis su chu mig bla brang pa zhes kyang grags te/ gang ltar bla ma 'phags pas chos 'khor rgya chen po bskor ba nas/ re zhig chu mig 'dir chos grwa cher dar bar ma byung ba la/ ta dben kun rin 'dis chos 'khor bskor ba nas bzung ste/ der chos grwa 'tshogs pa yin zhes kyang grags shing / de'i skabs su bla ma 'dis gung ru shes rin pa spyan drangs nas