[A:166b]rigs byed kyi bstan bcos la mkhas par sbyangs zhing / thun mong gi rig pa'i gnas lnga la mkhas pa'i mngon pa'i nga rgyal can/ 'jig rten na thams cad mkhyen pa'i yang dbang du ma gyur pa'i dregs pa can bidya ka ra ki ri dang / ta bhyu ba ki ri zhes pa gnyis rgya gar gyi yul nas byang phyogs su 'ong ste/ sems dpa' chen po 'di'i sku'i snyan pa'i grags pas bdas nas drung du bsnyegs nas zhal mthong ba'i mod la sngon gyi las kyi sgrib pa zad de/ skyes bu dam pa 'di la yid ches kyi dad pa cher skyes nas rtags rnam rtsen zhes bya ba'i sdeb sbyor gyis bcings pa'i bstod pa ngo mtshar bas bstod de/ sangs rgyas kyi bstan pa la rab tu 'byung bar zhus pa na/ ta dben kun dga' legs pa'i rgyal mtshan dpal bzang pos slob dpon mdzad nas mched gnyis kyis rab tu byung bar mdzad cing / mahA mA yA dang / sgrol ma la sogs pa'i dbang bskur ba du ma yang stsal te dam pa'i chos kyis yi rang ba mdzad do/ /de ltar phyi nang gi mkhas pa sus kyang 'gran zla dang bral ba'i chos kyi rgyal por gyur pa la brten nas rgya gar dang / bal po/ kha che/ gu ge pu rang / mnga' ris skor gsum/ rgya nag hor yul/ mdo stod smad la sogs pa 'dzam bu'i gling phal che ba'i mkhas pa thams cad kyi sgro 'dogs gcod pa'i zhing dam par gyur nas/ mkhas pa rnams kyang drung du bsnyegs shing 'gro ba thams cad kyi gtsug tu bkur ba'i rgyan chen por gyur pas/ chos rje pa rang gi bla ma rnams kyi nang nas kyang / nyan chen bsod nams brtan pa/ rong pa shes rab seng ge dpang lo blo gros