[A:178a]dang nus pas grub pa'i mtshan ma phyogs med du bstan te/ mthar shing pho stag gi lo'i zla ba gsum pa'i tshes bco lnga la shab dge sdings su sku'i bkod pa chos dbyings su bsdu bar mdzad pa yin la/ de'i tshe na yang ngo mtshar ba'i ltas bsam gyis mi khyab pa byung bar grags so/ /
de lta bu'i bdag nyid chen po rgya dkar shes rab rgyal mtshan du grags pa de'i gcung blo gros rgyal mtshan du grags pa ni/ yab 'jam dbyangs chen po dgung lo bzhi bcu zhe brgyad bzhes pa mig dmar zhes bya ba shing pho byi ba'i lo la/ bod chol kha gsum las bar gyi cha/ dbus gtsang ru bzhi las g.yas ru gtsang gi sa'i thig le/ shab sgo lnga gzhung gsum zhes bya ba'i yul gyi dbus sa gzhi lag mthil ltar snyoms shing / phyogs dang phyogs mtshams kyi yul gru chen po dag na/ ljongs dang / yul 'khor dang / grong khyer dang / skye bo'i mdun sa dang / sman ljongs dang / ne'u gsing yid du 'ong ba la me tog sna tshogs ched du bkram pa bzhin yod pa/ ljon shing gi ra ba 'khrigs pa'i yal ga dang / lo ma dag la brten pa'i bya sna tshogs skad snyan par sgrog pa/ 'bru bcud dang lo thog phun sum tshogs pas skye dgu thams cad bde bar 'tsho ba/ chu klung chen po rlabs kyi phreng ba cung zad dang bcas pas dkyil 'khor gyi mdun ngos su babs pa/ byams mgon gyi rnam 'phrul khro lo chen po'i gtsug lag khang dang khad nye ba'i sa phyogs/ rje btsun gong ma dag gi zhabs kyis bcags shing bdag gir mdzad pa'i gnas/ shab dge sdings kyi sa'i cha lcam mo g.yang glong