[A:230b]phyi nang gzhan gsum dpal ldan dus 'khor lo/ /zab lam rdo rje'i rnal 'byor la sogs pa'i/ /gtsug lag kun la mi 'jigs spobs pa thob/ /ces pa ltar ro/ /de ltar bdag nyid chen po 'dis yongs 'dzin dam pa rnams las phyi nang gi rig gnas kyis bsdus pa'i zab rgyas dam pa'i chos kyi bdud rtsi rnams phyogs dang ris med pa'i gdul bya blo gsal dad 'dun can rnams la 'chad pa gtso bor gyur pa'i mkhas pa'i bya ba rnam pa gsum gyis nyin mtshan khor yug tu 'da' bar mdzad pa'i tshul ni/ ji skad du/ sngon byon mkhas grub mang pos nyer bsten pa'i/ /bgrang yas chos kyi khri la mnga' mdzad nas/ /blo gsal mang po'i re ba skong mkhas pa'i/ /mgon khyod gangs can bstan pa'i bdag po nyid/ /blo gros lus dkar gangs ri'i rjes 'gro zhing / /gzhung mang 'chad rtsod rtsom pa'i gom stabs can/ /stong phrag mkhas btsun bzang po'i khyu mchog de/ /gus pas bsten khyed lnga rig paNDi ta/ /chos sgo brgyad khri bzhi stong gis mdzes pa'i/ /yongs rdzogs bstan pa'i khang bzang nyams dga' bar/ /bsnyengs bral thos bsam sgom pa'i khrir 'khod nas/ /ston pa'i rgyal sa 'dzin khyod 'od srung che/ /phyi rig gling chen bzhi la mnga' bsgyur zhing / /nang rig lhun po'i rtse mor bgrod mkhas pa'i/ /rnal 'byor dbang po rnams dang lhan cig tu/ /zab mo sgrog khyod grub pa'i dbang phyug che/ /yid 'ong mtshan dpe'i ri mo rnam bkra ba'i/ /thub chen rgyal ba'i zhal gyi ltad mo ni/ /skyon bral thugs kyi me long ngos yangs por/ /nges par gzigs khyod sa thob sems