[A:3b]zhes bya ba 'di 'chad pa la don lnga ste/ 'od gsal lha'i gdung rabs bshad pa/ dri med 'khon gyi gdung rabs bshad pa/ lha rigs 'khon sa skya pa'i gdung rabs bshad pa/ de las gyes pa'i bla brang rnam bzhi'i gdung rabs bshad pa/ skabs su babs pa'i don gzhan bshad pa'o/ /de'i dang po 'od gsal lha'i gdung rabs bshad pa la yang tshigs bcad kyi sgo nas mdor bstan pa dang / de'i don rgyas par bshad pa gnyis las/ dang po ni/ /mkhas pa'i dbang po dkon mchog lhun grub kyis mdzad pa'i sa skya pa'i gdung rabs ya rabs kha rgyan las/ /'jam dbyangs sprul pa dpal ldan sa skya pa'i/ /gdung gi thog ma 'od gsal lha yul du/ /spyi ring g.yu ring g.yu se mched gsum byon/ /g.yu ses mi rje mdzad nas sras bzhi bskrun/ /de yi grogs su gcen po g.yu ring byon/ /g.yu ring dang ni dmu bza' ldem bu'i sras/ /ma bzang spun bdud byon pa'i gcen po drug /yab dang bcas pa lha yi yul du gshegs/ /bdun gyi tha chung ma bzang spyi rje dang / /thog lcam 'ur mo'i sras ni dpa' bo stag /de dang klu lcam bra ma gnyis kyi sras/ /klu tsha stag po 'od can zhes pa byung / /klu tsha dang ni mon bza' mtsho mo rgyal/ /lhan cig bzhugs pa'i rigs sras g.ya' spang gi /mtshams su 'khrungs pas mtshan yang g.ya' spang skyes/ /zhes grags gzhan gyis mi thub dpa' bo byon/ /zhes so/ /gnyis pa de'i don rgyas par bshad pa la/ de la spyir bod kha ba can gyi ljongs 'dir rigs gsum mgon po'i rnam sprul chos rgyal byang chub sems dpa' rnams kyis rgyal ba'i bstan pa sngar med gsar du btsugs/ gtsang g.yo dmar gsum/ bla chen mkhan brgyud rnams kyis sngar yod nyams pa gsos/ lha btsun khu dbon/ jo bo yab sras/ 'brog 'gos mar gsum/ pa tshab rngog khyung / ra 'bro la sogs pas shin tu dar ba mdzad mod kyi/ phal cher mdo dang sngags kyi phyogs re ba tsam du zad la/ dus phyis rgyal ba thams cad kyi ye shes gcig tu bsdus pa rje btsun 'jam pa'i dbyangs nyid 'khon gyi gdung brgyud kyi tshul bzung nas/ phyi nang mdo sngags bshad sgrub kyi bstan pa mtha' dag 'dzin skyong spel gsum gyi sgo nas ches shin tu rgyas par mdzad de/ shar phyogs rgya mtsho'i mthas gtugs pa'i 'dzam gling byang phyogs kyi skye dgu thams cad chos dang zang zing gi dpal 'byor bzang pos legs par bskyangs pa ni ngo mtshar zhing bka' drin shin tu che bar gyur pa yin pas/ de lta bu'i skyes bu bzang po rim par byon pa de rnams kyi byon tshul dang / rnam par thar pa 'chad pa dang nyan pa la 'bad par bya ba ni don chen po dang ldan pa nyid du rig par bya'o/ /de la 'di'i rigs ni bod du bram ze'i rigs su gsal ba ma byung bas/ rgyal rigs/ rje'u rigs/ dmangs rigs gsum las/ zhang blon rje'u rigs yin te/ 'di nyid kyi mi'i gdung rabs kyi thog ma dkon pa rje gung stag tu grags pa de nyid nas 'dzin par bshad pa'i phyir ro/ /rus ni bod kyi rus chen bzhi dang / mi'u rigs drug tu grags pa sogs las chad pa ma yin gyi/ gdung rus gtsang ma lha las babs pa yin te/ de yang nges pa'i don du 'jam