[A:48b]shes phyi nang kun rig rnam dpyod blo gros mtshungs med nga / /'di 'dra gang yin sa skya pa ste mkhas pa gzhan dag gzugs brnyan yin/ /zhes dang / 'ga' zhig 'di skad du 'dri ste/ /sa skya paNDi ta khyod mkhas pa rnams la yongs su grags pa'i shes bya phal che ba shes par khas 'che ba zhig 'dra na/ mngon pa'i nga rgyal gyis mi shes bzhin du shes so snyam nas khas 'che ba'am/ 'on te shes pa dang mi shes pa'i rtog dpyod ma btang bar smyon tshig lta bur 'dod rgyal du khas blang ba zhig gam/ gal te ya rabs kyi tshul du legs par shes pa la shes par bzung nas drang po'i rang bzhin nyid smras pa yin zhe na/ smras pa 'di rgyu mtshan med par smras pa ma yin gyi/ legs par thos shing shes la gzhan la yang chos dang mthun par lan 'debs par myong bas grub nas sgra pa nga yin zhes bya ba la sogs pa smras so zhes dang / skye ba gzhan du sbyangs pa dang / /mkhas pa du ma bsten pa dang / /rnam par dpyod pa'i blo gros kyis/ /shes bya kun la 'jigs med thob/ /ces mdor bsdus te gsungs pa la/ de nyid rgyas par bshad na mkhas par bya ba'i yul ni/ de yul brda sprod rtog ge dang / /gso ba phyi nang rig ces bya/ /zhes pa ltar rig pa'i gnas lnga yin pa las/ sgra rig pa ni brda sprod par byed pa'i bstan bcos yin la/ de'i gtsug gi nor bu lta bur ka lA pa dang / tsandra pa yan lag gi bstan bcos dang bcas pa rnams legs par mkhyen pas tshig gi cha gang la'ang thogs pa med pa'i mkhyen pa can smra ba'i mchog tsandra go mi dang / rgyas pa dang / gnas 'jig dang / grog mkhar