[A:105]ལག་ལེན་ཐོས་བསམ་གྱིས་གཏན་ལ་ཕབ་པའི་ཟླ་ཟེར་གྱི་བརྒྱུད་པ་ནི། ངོར་ཆེན་རྡོ་རྗེ་འཆང་ཀུན་དགའ་བཟང་པོ་ནས། རྒྱལ་ཚབ་དམ་པ་ཀུན་དགའ་དབང་ཕྱུག ཡོངས་འཛིན་དཀོན་མཆོག་འཕེལ་པ། ས་སྐྱ་ལོ་ཙཱ་བ་འཇམ་དབྱངས་ཀུན་དགའ་བསོད་ནམས། ཐམས་ཅད་མཁྱེན་པ་དཀོན་མཆོག་ལྷུན་གྲུབ། མཚུངས་མེད་དཀོན་མཆོག་དཔལ་ལྡན། བྱམས་པ་ཀུན་དགའ་བཀྲ་ཤིས། འདི་ནས་བླ་མ་གཉིས་ཙམ་བཙལ། མཁན་ཆེན་ཐམས་ཅད་མཁྱེན་པ་ཚུལ་ཁྲིམས་ལྷུན་གྲུབ། དེས་བདག་བནྡེ་ཚུལ་ཁྲིམས་རིན་ཆེན་ལ་བཀའ་དྲིན་དུ་སྩལ་ཏོ། །མན་ངག་ལུགས་ཀྱི་བསྐྱེད་རིམ་གྱི་རྣམ་པར་བཤད་པའི་བརྒྱུད་པ་ནི། ཀུན་མཁྱེན་བསོད་ནམས་སེང་གེ་ནས། ཡོངས་འཛིན་དཀོན་མཆོག་འཕེལ། འཇམ་དབྱངས་དཀོན་མཆོག་ལྷུན་གྲུབ། རྡོ་རྗེ་འཆང་དཀོན་མཆོག་དཔལ་ལྡན། ཤར་ཆེན་བྱམས་པ་ཀུན་དགའ་བཀྲ་ཤིས། ཤར་ཆེན་ཤེས་རབ་འབྱུང་གནས། མུས་པའི་དགེ་བཤེས་ཚུལ་ཁྲིམས་མཚན་ཅན། ཐམས་ཅད་མཁྱེན་པ་ཚུལ་ཁྲིམས་ལྷུན་གྲུབ། དེས་བདག་ལ་སྩལ་ཏོ། །༈། །གཉིས་པ་གསུང་རྟེན་ནི་གོང་དུ་སྨོས་པའི་ཡིག་རིས་རྣམས་ལས་བོད་དུ་འདྲི་སྲོལ་མཆིས་པའི་ནང་ནས་ལཱཉྩ་ན་དང༌། ཝརྟུ་ལ་དང༌། ནཱ་ག་ར་དང༌། སིནྡྷུ་དང༌། པུཀྐཾ་དང༌། དྷ་རི་ཀ་དང༌། ཀསྨཱི་ར་དང༌། འཕགས་པས་མཛད་པའི་ཧོར་གྱི་ཡིག་གསར་ལ་སོགས་པ་ལག་ཁྲིད་དུ་བྱས་པའི་སློབ་དཔོན་དང་བརྒྱུད་རིམ་ནི་གོང་གི་བརྡ་སྤྲོད་པའི་སྐབས་ལྟར་འདེད་པས་བཏུབ་བམ་སྙམ་མོ། །བོད་ཀྱི་ཡི་གེ་ལ་སློབ་དཔོན་ཐུ་མི་སཾ་བྷོ་ཊས་མཛད་པའི་ཡི་གེའི་རྒྱུན་ལས་བརྒྱུད་དེ་ཁྱུང་པོ་