[A:16]སར་འཁྲིད་པར་བཟོད་པའི་དོན་གཉིས་ལྷུན་གྱིས་གྲུབ་པའི་བདག་ཉིད་ཅན་གང་དེ་བསྒྲུབ་ཏུ་ཡོད་པའི་རྟེན་དམ་པ་བ་དེ་རྒྱུ་བསྒྲུབ་པར་ཁོམ་པ་མིན་པའི་སྐྱེ་གནས་ཀྱིས་རྣམ་པར་བསླད་པ་མེད་པའི་དལ་བ་ཕུན་སུམ་ཚོགས་པ་དང༌། རང་གཞན་སྟོབས་ཀྱིས་ཐོབ་པའི་འབྱོར་པ་ཕུན་སུམ་ཚོགས་པ་དང་ལྡན་པའི་ལུས་རྟེན་ལན་གཅིག་ཙམ་ཐོབ་པ་འདི་ནི། ཡིད་བཞིན་གྱི་ནོར་བུ་རིན་པོ་ཆེ་རྙེད་པ་ལས་ཀྱང་ཕན་ཡོན་ཆེས་ལྷག་པ་ཐོབ་པའི་སྐབས་འདིར་དམ་པའི་སྙིང་པོ་ཅན་དུ་སྒྲུབ་པ་ནི་ཤིན་ཏུ་འབད་པར་བྱ་དགོས་ཏེ། སློབ་དཔོན་ཞི་བའི་ལྷས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱི་ནས་རྙེད་དཀའ་ཡིས། །རྨོངས་པ་དུས་སུ་གཉིད་མ་ལོག། ཅེས་གསུངས་པ། དེ་ལྟ་བུའི་རྟེན་དེ་ལ་བརྟེན་ནས་ལེ་ལོ་དང་སོས་དལ་གྱི་དབང་དུ་མ་སོང་བར་སྙིང་པོ་བླང་བའི་ཐབས་ལ་རྟུན་པ་ཆེར་བསྐྱེད་དགོས་པའང༌། འཕགས་པ་ཀླུ་སྒྲུབ་ཞབས་ཀྱིས། ཚེ་འདིར་གནོད་མང་རླུང་གིས་བཏབ་པ་ཡིས། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་འབྱུང་དབུགས་རྔུབ་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་དང༌། ངོར་ཆེན་རྡོ་རྗེ་འཆང་ཀུན་དགའ་བཟང་པོ་པས་ཀྱང༌། སྲིད་གསུམ་ཐམས་ཅད་མི་རྟག་ངང་ཚུལ་ཅན། །སྐྱེས་བུའི་ཚེ་ཡང་རྩྭ་རྩེའི་ཟིལ་པ་ལྟར། །མི་རྟག་མྱུར་དུ་འཆི་བར་ངེས་པས་ན། །ཤུགས་དྲག་བརྩོན་འགྲུས་བསྐྱེད་དང་བློ་ལྡན་དག། ཅེས་གསུངས་པ་ལྟར་སྤྱིར་ལས་མངོན་པར་འདུས་བྱས་པ་ལས་གྲུབ་པའི་སྲིད་པ་གསུམ་དུ་སྣོད་བཅུད་ཀྱི་རྣམ་པར་ཇི་སྙེད་ཅིག་སྣང་བ་ཐམས་ཅད་མི་རྟག་ཅིང་མི་བརྟན་པར་རྣམ་པར་འགྱུར་བའི་