[A:17]ཆོས་ཅན་ལས་གཞར་ཡང་མ་འདས་པའི་ཕྱིར་དང༌། ཁྱད་པར་སྐྱེས་བུའི་འཚོ་བ་ཉིད་ནི་སྐད་ཅིག་སྔ་མ་ནས་ཕྱི་མའི་ཡུན་ཚད་ཙམ་དུའང་རྟག་པའི་ངེས་པ་ཡོད་པར་མ་གསུངས་པའི་ཕྱིར། ཚེ་འདིའི་བྱ་བ་ཐམས་ཅད་ཆུ་ཤིང་བཞིན་དུ་སྙིང་པོ་མེད་པར་ཤེས་པར་བྱས་ནས། ཐར་པ་དང་ཐམས་ཅད་མཁྱེན་པ་སྒྲུབ་པའི་ཐབས་ཀྱིས་ནམ་ཡང་མི་བསླུ་ངེས་པ་ཉིད་ནི། སངས་རྒྱས་བཅོམ་ལྡན་འདས་ཀྱི་བསྟན་པ་རིན་པོ་ཆེ་ཁོ་ན་སྟེ་དེའི་རྗེས་སུ་རིམ་གྱིས་འཇུག་པ་དང་ཉེ་བར་ཞུགས་པའི་སྒོ་ནས་སྙིང་པོ་བླང་དགོས། སྙིང་པོ་ལེན་པའི་ཐབས་ལ་བཞི་སྟེ། འཇུག་ཡུལ་ཤེས་པའི་ཆེད་དུ་བསྟན་པའི་རྣམ་གཞག་བསྟན་པ། འཇུག་སྒོ་ཤེས་པའི་ཆེད་དུ་ཐོས་བསམ་ལ་རིམ་གྱིས་སློབ་ཚུལ། ཐོས་དོན་ཡིད་ཆེས་ཆེད་དུ་ཆོས་ཀྱི་བརྒྱུད་རིམ་བསྟན་པ། ཐོས་བསམ་དོན་ཡོད་ཆེད་དུ་རང་གཞན་དོན་གཉིས་སྒྲུབ་པའི་ཚུལ་ལོ། །དང་པོ་འཇུག་ཡུལ་ཤེས་པའི་ཆེད་དུ་བསྟན་པའི་རྣམ་གཞག་བསྟན་པ་ནི། བདག་ཅག་གི་སྟོན་པ་ཚད་མེད་པའི་ཡོན་ཏན་དང་ཐུགས་རྗེར་ལྡན་པ་ཀུན་མཁྱེན་ཉི་མའི་རྩ་ལག་ཆེན་པོ་དེ་ཉིད་ཀྱིས། གདུལ་བྱ་རྣམས་ཀྱི་ཁམས་དང་བསམ་པ་དང་རྗེས་སུ་མཐུན་པར་ཉོན་མོངས་པའི་གཉེན་པོར་དམ་པའི་ཆོས་ཀྱི་བདུད་རྩིའི་སྒོ་འཕར་བསམ་གྱིས་མི་ཁྱབ་པར་ཕྱེ་སྟེ། ཇི་སྐད་དུ་མཛོད་ལས། སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་སོ། །དེའི་རྣམ་པར་གཞག་པ་ལ་གཉིས་ཏེ། ཆོས་སྤྱི་མདོར་བསྟན་པ་དང༌། བྱེ་བྲག་རྒྱས་པར་བཤད་པའོ། །དང་པོ་ནི་སྤྱིར་ཆོས་ཞེས་བྱ་བའི་སྒྲ་དེ་དོན་དུ་ལ་འཇུག་ཅེ་ན། རྣམ་བཤད་རིག་པ་ལས། ཆོས་ནི་ཤེས་