[A:18]བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང༌། །འབྱུང་འགྱུར་ངེས་དང་ཆོས་ལུགས་ལའོ། །ཞེས་ཆོས་ཀྱི་སྒྲ་འཇུག་ཡུལ་བཅུ་ལ་བཤད་པ་ལས། འདིར་ཤེས་བྱ་དང༌། ལམ་དང༌། མྱ་ངན་ལས་འདས་པ་གསུམ་བརྗོད་བྱར་བྱས་ནས། གསུང་རབ་རྗོད་བྱེད་ཀྱི་དབང་དུ་བྱས་པའི་དམ་པའི་ཆོས་སོ། །གཉིས་པ་བྱེ་བྲག་ཏུ་རྒྱས་པར་བཤད་པ་ལ་གསུམ་སྟེ། མཚན་ཉིད། སྒྲ་དོན། དབྱེ་བའོ། །དང་པོ་ནི་གང་ཞིག་སྤྱད་ཅིང་ཉམས་སུ་བླངས་པས་སེམས་ཅན་རྣམས་ཀྱི་སྒྲིབ་པ་ཟད་པའི་ཐབས་སུ་གྱུར་པ་གང་ཡིན་པ་དེ་ཉིད་དོ། །དེ་སྐད་དུའང་མདོ་ལས། སྡུག་བསྔལ་དག་ནི་ཐམས་ཅད་དང༌། །སྒྲིབ་པ་ཀུན་སེལ་དམ་པའི་ཆོས། །ཞེས་སོ། །གཉིས་པ་ནི། ལེགས་པར་སྦྱར་བའི་སྐད་དུ། སདྡྷརྨྨ་ཞེས་འབྱུང་བ། བོད་སྐད་དུ་དམ་པའི་ཆོས་ཏེ། དམ་པ་ནི་རྫོགས་པའི་སངས་རྒྱས་ཡིན་ལ། དེས་གསུངས་པའི་ཆོས་ཡིན་པས་སམ། དམ་པ་ཡང་ཡིན་ལ་ཆོས་ཀྱང་ཡིན་པས་སམ། སྐྱེས་བུ་དམ་པ་རྣམས་ཀྱིས་སྤྱད་པར་བྱ་བ་ཡིན་པས་ན་དམ་པའི་ཆོས་སོ། །གསུམ་པ་ལ་གཉིས། བརྗོད་བྱ་རྗོད་བྱེད་ཀྱི་སྒོ་ནས་དབྱེ་བ་དང༌། རྒྱུ་དང་འབྲས་བུའི་སྒོ་ནས་དབྱེ་བའོ། །དང་པོ་ལ། རྟོགས་པའི་དམ་པའི་ཆོས་དང༌། ལུང་གི་དམ་པའི་ཆོས་གཉིས་ཏེ། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་སོ། །རྟོགས་པའི་ཆོས་ཀྱི་མཚན་ཉིད་ནི། ལུང་གི་དམ་པའི་ཆོས་ཉམས་སུ་བླངས་པ་ལས་བྱུང་བའི་རྣམ་བྱང་གི་བདེན་པའོ། །དབྱེ་ན་འགོག་བདེན་དང༌། ལམ་བདེན་གཉིས་ཏེ། རྒྱུད་བླ་མ་ལས། གང་