[A:18]bya lam dang ni/ /mya ngan 'das dang yid kyi yul/ /bsod nams tshe dang gsung rab dang / /'byung 'gyur nges dang chos lugs la'o/ /zhes chos kyi sgra 'jug yul bcu la bshad pa las/ 'dir shes bya dang / lam dang / mya ngan las 'das pa gsum brjod byar byas nas/ gsung rab rjod byed kyi dbang du byas pa'i dam pa'i chos so/ /gnyis pa bye brag tu rgyas par bshad pa la gsum ste/ mtshan nyid/ sgra don/ dbye ba'o/ /dang po ni gang zhig spyad cing nyams su blangs pas sems can rnams kyi sgrib pa zad pa'i thabs su gyur pa gang yin pa de nyid do/ /de skad du'ang mdo las/ sdug bsngal dag ni thams cad dang / /sgrib pa kun sel dam pa'i chos/ /zhes so/ /gnyis pa ni/ legs par sbyar ba'i skad du/ saddharmma zhes 'byung ba/ bod skad du dam pa'i chos te/ dam pa ni rdzogs pa'i sangs rgyas yin la/ des gsungs pa'i chos yin pas sam/ dam pa yang yin la chos kyang yin pas sam/ skyes bu dam pa rnams kyis spyad par bya ba yin pas na dam pa'i chos so/ /gsum pa la gnyis/ brjod bya rjod byed kyi sgo nas dbye ba dang / rgyu dang 'bras bu'i sgo nas dbye ba'o/ /dang po la/ rtogs pa'i dam pa'i chos dang / lung gi dam pa'i chos gnyis te/ mdzod las/ ston pa'i dam chos rnam gnyis te/ /lung dang rtogs pa'i bdag nyid do/ /zhes so/ /rtogs pa'i chos kyi mtshan nyid ni/ lung gi dam pa'i chos nyams su blangs pa las byung ba'i rnam byang gi bden pa'o/ /dbye na 'gog bden dang / lam bden gnyis te/ rgyud bla ma las/ gang