[A:433]ལའོ། །སྨྲས་པ། འཁོན་སྟོན་ལས་བརྒྱུད་རྡོ་རྗེ་གཞོན་ནུའི་དབང༌། །བླ་མ་དྲག་སྒྲུབ་འཆི་མེད་སྒྲུབ་སྐོར་གཉིས། །ཡང་གསང་དབང་དང་ཆོས་སྐོར་རྨུགས་འཛིན་སོགས། །སྔ་འགྱུར་གསང་སྔགས་ཐོར་བུའི་ཐོས་ཚུལ་ཡིན། །ཞེས་དམ་པའི་ཆོས་ཐོས་པའི་ཡི་གེ་དོན་གཉེར་གདེངས་ཅན་རོལ་པའི་ཆུ་གཏེར་ལས། གསང་སྔགས་སྔ་འགྱུར་གྱི་ཆོས་སྐོར་ཐོས་པའི་བརྒྱུད་རིམ་གྱིས་སརྒ་སྟེ་བཅུ་བཞི་པའོ། །། །མཁས་ཤིང་གྲུབ་པའི་འཁོར་ལོས་སྒྱུར་བ་རྩ་གསུམ་འདུས་པའི་བདག་ཉིད་ཆེན་པོ་མཚོ་ལས་སྐྱེས་པའི་རྡོ་རྗེའི་སྒྱུ་འཕྲུལ་དྲྭ་བའི་ཟློས་གར། རིག་འཛིན་སྤྲུལ་པའི་སྐུ་གཏེར་བདག་གླིང་པ་འགྱུར་མེད་རྡོ་རྗེའི་ཞབས་ཀྱིས། བཀའ་དང་ཟབ་གཏེར་གྱི་བསྟན་པའི་ཆུ་གཏེར་ཆེན་པོ་ལས། མཆོག་དང་ཐུན་མོང་གི་དངོས་གྲུབ་ཐོགས་པ་མེད་པར་སྒྲུབ་པའི། རྩ་བ་གསུམ་གྱི་ལྷག་པའི་ལྷའི་འཁོར་ལོའི་རྣམ་པ་མཐའ་ཡས་པར་འབྱུང་བ་རྣམས་ཀྱི་སྒྲུབ་པའི་ཐབས་ཡོངས་སུ་གྲགས་པ་རྣམས་དོན་དུ་གཉེར་བ་དང་པོའི་ལས་ཅན་རྣམས་ལ་ཉེ་བར་མཁོ་བའི་ཕྱིར་དང༌། ཤིན་ཏུ་དཀོན་པ་འགའ་ཞིག་ནི་རྒྱུན་མི་ཆད་པར་བྱ་བའི་ཕྱིར་དང༌། ཕྱི་འགྱུར་གྱི་སྒྲུབ་ཐབས་འགའ་ཞིག་ཀྱང་ཉེར་མཁོའི་དབང་དུ་བྱས་ནས་ཕྱོགས་གཅིག་ཏུ་བསྡེབས་པ་སྒྲུབ་ཐབས་འདོད་འཇོའི་བུམ་བཟང་ཞེས་བྱ་བ་ནས་འབྱུང་བའི་ལྷ་ཚོགས་རྣམས་ཀྱི་དབང་བསྐུར་བྱིན་རླབས་རྗེས་གནང་རིག་གཏད། བཟླས་ལུང་ལ་སོགས་པའི་བཀའ་སྲོལ་མ་ཉམས་པར་བཞུགས་པའི་ཆོ་གའི་རྣམ་གྲངས་ཐ་དད་པའི་ཚུལ་ཅན་ཇི་སྙེད་ཅིག་བཞུགས་པ་རྣམས་ལེགས་པར་ཐོབ་པའི་རྣམ་གྲངས་ལ། ༈ཐོག་མར་བླ་མ་ཞི་བའི་