[A:590]སངས་རྒྱས་ཕུན་ཚོགས། གཙང་གསར་ཆོས་རྗེ། གཏེར་དབོན་བསོད་ནམས་ལྷུན་གྲུབ། དེས་བདག་ཚུལ་ཁྲིམས་རིན་ཆེན་ལའོ། །སྨྲས་པ། རྩ་བཤད་རྒྱུད་ཀྱིས་ཉེར་བསྟན་ཀྱེ་རྡོ་རྗེ། །བཀའ་བབས་རྣམ་གསུམ་གུར་དང་ཁ་སྦྱོར་དབང༌། །ཤེས་རབ་ཕ་རོལ་ཕྱིན་མ་མགོན་རྐྱང་བཅས། །ཀུན་འཁྱིལ་ལ་སོགས་བཀས་གནང་སྐལ་བ་སྦོམ། །ཞེས་དམ་པའི་ཆོས་ཐོས་པའི་ཡི་གེ་དོན་གཉེར་གདེངས་ཅན་རོལ་པའི་ཆུ་གཏེར་ལས། ཐབས་ཤེས་གཉིས་མེད་དགྱེས་པ་རྡོ་རྗེའི་རྒྱུད་གསུམ་གྱི་ཆོས་སྐོར་ཐོས་པའི་བརྒྱུད་རིམ་གྱི་སརྒ་སྟེ་བཅུ་དགུ་པའོ། །། །གཉིས་སུ་མེད་པའི་རྒྱུད་ཀྱི་རྒྱལ་པོ་དང་པོའི་སངས་རྒྱས་དཔལ་དུས་ཀྱི་འཁོར་ལོའི་སྐོར་ལ། རྫོགས་པའི་སངས་རྒྱས་ཉི་མའི་གཉེན་ཉིད་ཤིང་ཕོ་རྟའི་ལོ་ས་གས་ཉ་བའི་ཚེས་ལ་ཟག་པ་མེད་པའི་བདུད་རྩི་མཆོག་བརྙེས་པའི་གོ་འཕང་བླ་ན་མེད་པ་མངོན་དུ་མཛད་ནས་བགྲང་གཞི་བཞི་བཅུ་རྩ་དྲུག་འདས་པ་ལྕགས་འབྲུག་ནག་པའི་ཟླ་བར་ཤྲཱི་དྷ་ནྱ་ཀ་ཊ་ཀའི་མཆོད་རྟེན་གྱི་ནང་གི་སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་སྤྲོས་ཏེ་སྤྲུལ་པའི་ཆོས་རྒྱལ་ཟླ་བ་བཟང་པོ་ལ་སོགས་པ་སྐལ་ལྡན་གྱི་གདུལ་བྱ་རྣམས་སྨིན་པར་མཛད། དེའི་ཕྱི་ལོ་ཆོས་རྒྱལ་ཟླ་བ་བཟང་པོས་དུས་འཁོར་རྩ་བའི་རྒྱུད་བསྡུས། བྱང་ཕྱོགས་ཤམ་བྷ་ལར་ཆོས་རྒྱལ་དྲུག་དང་རིགས་ལྡན་བཅུ་བདུན་འདས་ཤིང་རིགས་ལྡན་རྣམ་གནོན་གདོང་ལྔའི་དབང་པོས་སྒེག་པའི་ཆོས་ཀྱི་ཁྲིར་ཕེབས་ཤིང༌། དམ་པའི་ཆོས་བསྟན་ནས་ལོ་སུམ་ཅུ་རྩ་ལྔ་པ། མེ་མཁའ་རྒྱ་མཚོ་ལ་འདས་ལོ་དྲུག་ཅུ་སྐོར་བདུན་དང་ཉག་མ་ལྔ་བཅུར་སླེབས་པ། རབ་བྱུང་བཅུ་གསུམ་པའི་ཁྱུ་མཆོག་ཅོ་ཞེས་པའི་གནམ་ལོ་ཤར་