[A:92]ལུས་ཀྱི་རྩ་ཁམས་གསུམ། །གསང་བར་སེམས་ཉིད་གསལ་སྟོང་ཟུང་འཇུག་གསུམ། །དབྱེར་མེད་སྲིད་ཞིའི་མགོན་པོའི་ཆོས་ཀྱི་སྐོར། །དེའང་འཛམ་གླིང་བསྟན་པའི་མངའ་བདག་ལྷ་མཆོག་འཇམ་པའི་དབྱངས་ཀྱི་སྒྱུ་འཕྲུལ་རོལ་པ་རྗེ་བཙུན་ས་སྐྱ་པ་ཡབ་སྲས་ལ་བསྟན་པ་བསྲུང་བའི་མཚོན་ཆར་ཆོས་སྐྱོང་བའི་སྲུང་མ་གྲངས་མེད་པ་ཞིག་བཀའ་བབས་པའི་ནང་ནས་རྒྱ་གར་མ་ག་དྷཱའི་རྡོ་རྗེ་གདན་གྱི་སྒོ་སྐྱོང་འཕགས་ཡུལ་པཎ་གྲུབ་རྣམས་ཀྱི་སྲུང་མའི་གཙོ་བོ་རྡོ་རྗེ་ནག་པོ་ཆེན་པོ་གུར་གྱི་མགོན་པོ་ནི། མཁའ་འགྲོ་མ་རྡོ་རྗེ་གུར་གྱི་རྒྱུད་ལས། དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་ནག་པོ་ཆེན་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་ཞེས་འབྱུང་བ་ལྟར། བཅོམ་ལྡན་འདས་རྡོ་རྗེ་འཆང་ཆེན་པོའི་སྐུ་གསུང་ཐུགས་དབྱེར་མི་ཕྱེད་པའི་སྤྲུལ་པར་བསྟན་པས་ཕྱོགས་རེ་ཙམ་གྱི་སྤྲུལ་པའི་བསྟན་སྲུང་གཞན་ལས་ཆེས་ཁྱད་པར་དུ་འཕགས་པའི་ཕྱིར་བསྟན་སྲུང་ཀུན་གྱི་གཙོ་བོ་སྟེ། ཚུལ་དེ་ལ་དགོངས་ནས་ཀུན་མཁྱེན་མཁྱེན་བརྩེའི་དབང་ཕྱུག་གིས། བགྲང་ཡས་བསྟན་སྲུང་ཀུན་གྱི་སྡེ་དཔོན་ཆེ། །དྲན་པས་སྙིང་གི་མུན་སེལ་རྡོ་རྗེ་གུར། །ཞེས་ཆེད་དུ་བརྗོད་པའང་སྒྲོ་སྐུར་གྱིས་དབེན་པའི་རང་བཞིན་བརྗོད་པའི་རྒྱན་ཁོ་ན་སྟེ། དེའང་དཔལ་ཀྱེ་རྡོ་རྗེའི་བཤད་པའི་རྒྱུད་རྡོ་རྗེ་གུར། མགོན་པོ་མངོན་པར་འབྱུང་བ། ལྷ་མོའི་ཁུངས་འཕགས་ཡུལ་ན་བཞུགས་པའི་གདན་བཞིའི་རྒྱུད་རྒྱས་པ་ལ་སོགས་པ་རྣམས་ལས་གསལ་བར་བསྟན། བཀའ་ལུང་གི་འགྲེལ་བྱེད་དམ་པ་འཕགས་པའི་ཡུལ་དུ་གྲུབ་པ་མཆོག་གི་ས་ལ་བཞུགས་པའི་སློབ་དཔོན་བྲམ་ཟེ་མཆོག་སྲེད་ལ་སོགས་པས་དར་ཞིང་