[A:93]རྒྱས་པར་མཛད། བསིལ་ལྡན་ཁ་བའི་ལྗོངས་འདིར་མ་ཧཱ་པཎྜི་ཏ་གྷ་ཡ་དྷ་ར་དང་དོན་ཡོད་རྡོ་རྗེ་དང་ཤྲདྡྷཱ་ཀ་ར་ཝརྨ་དང་ཤཱཀྱ་ཤྲཱི་རྣམས་ལས་བརྒྱུད་དེ་བྱོན་པ་འཇམ་དཔལ་རྡོ་རྗེ་རྗེ་བཙུན་ས་སྐྱ་པ་ཡབ་སྲས་རྣམས་ཀྱིས་ཆེས་ཆེར་གསལ་བར་མཛད་དེ། མ་ཧཱ་ཀཱ་ལའི་ཆོས་སྐོར་གྱི་བརྗེད་བྱང་བསམ་འཕེལ་ནོར་བུའི་ཕྲེང་བ་ལས། ཁྱབ་བདག་གུར་གྱི་མགོན་པོའི་ཆོས་སྐོར་ནི། །འཕགས་པའི་ཡུལ་དུ་པཎ་གྲུབ་རྣམས་ཀྱིས་ཕྱེ། །རྒྱུད་རྒྱལ་མ་དྲོས་ཆུ་གཏེར་ལས་བྱུང་བའི། །བཀའ་བབས་རྣམ་བཞིའི་གདམས་པའི་ཆུ་རྒྱུན་ནི། །ལོ་ཙཱ་རྣམ་བཞིའི་གསུང་གི་འབབ་སྟེགས་ལས། །ལེགས་འོངས་ས་སྐྱའི་བླ་ཆེན་ཐུགས་མཚོར་འཁྱིལ། །གང་དེའི་གསུང་གི་བདུད་རྩིའི་ཟེགས་མ་ནི། །ཕྱོགས་བརྒྱར་འཕྲོས་པས་ཁ་བའི་སྨན་ལྗོངས་འདིར། །ཟབ་སྟོན་ལྦུ་ཕྲེང་བྱེ་བས་ཕྱུག་པ་ཡི། །རྗེས་འབྲངས་ཆུ་ཀླུང་རྣམ་བཞི་རིང་དུ་བབས། །ཞེས་པ་ལྟར་རྒྱུད་རྒྱལ་རྣམས་ཀྱི་གདམས་པའི་སྙིང་པོ་འཕགས་ཡུལ་པཎ་གྲུབ་རྣམས་ཀྱིས་སྲོལ་རྒྱས་བསྡུས་སྣ་ཚོགས་སུ་བཏོད་པའི་ནང་ནས་རྣལ་འབྱོར་དབང་ཕྱུག་བིརྺ་པ་ལས་བརྒྱུད་པའི་ལམ་འབྲས་པའི་གུར་གྱི་མགོན་པོའི་གདམས་པ་ལོ་ཆེན་འབྲོག་མིས་བསྒྱུར་བ་དང༌། བླ་མ་རྡོ་རྗེ་གདན་པ་ལས་བརྒྱུད་པ་སྒྲུབ་ཐབས་ཀུན་ལས་བཏུས་པ་ལུགས་ཀྱི་མགོན་པོའི་གདམས་པ་བ་རི་ལོ་ཙཱ་བས་བསྒྱུར་བ་དང༌། པཎྜི་ཏ་དད་བྱེད་གོ་ཆ་ལས་བརྒྱུད་པའི་མགོན་པོའི་གདམས་པ་ལོ་ཆེན་རིན་བཟང་གིས་བསྒྱུར་བ་མལ་ལོ་ཙཱ་བའི་ལུགས་སུ་གྲགས་པ་དང༌། ཀཥྨི་རའི་བསོད་སྙོམས་པ་ཆེན་པོ་པཎ་ཆེན་ཤཱཀྱ་ཤྲཱི་ལས་བརྒྱུད་པའི་མགོན་པོའི་གདམས་པ་ས་ལོ་ཙཱ་བ་