[A:94]ཀུན་དགའ་རྒྱལ་མཚན་གྱིས་བསྒྱུར་བ་སྟེ་ལོ་པཎ་ཆེན་པོ་བཞི་ལས་བརྒྱུད་པའི་བཀའ་མ་ཆད་པ་ཆུ་བོ་ཆེན་པོ་བཞིའི་རྒྱུན་ལྟར་བབས་པའོ། །གྱི་ལྗང་ལུགས་ནི་ལོ་ཆེན་རིན་བཟང་ནས་མལ་ལོར་བརྒྱུད་པ་ཡིན་ནའང༌། སྟོད་ལུགས་སྨད་ལུགས་གཉིས་སུ་བྱུང་བའི་སྟོད་ལུགས་རྣམས་མལ་ལོ་ནས་བརྒྱུད་པ་ཡིན་པས་བཀའ་བབས་ཕྱི་མའི་ཁོངས་སུ་དོན་གྱིས་འདུ་ཞིང༌། ལྷ་བཅུ་བདུན་མའི་དབང་ལོ་ཆེན་ནས་བརྒྱུད་པ་དང་གྱི་ལྗང་སྨད་ལུགས་ཀྱི་གདམས་སྐོར་རྣམས་རྗེ་བཙུན་གོང་མ་རྣམས་ལས་མ་བརྒྱུད་ནའང༌། གཞི་ཐོག་པ་སྔགས་འཆང་ཀུན་དགའ་ཟླ་བ་ནས་ས་ལུགས་སུ་བཀའ་བབས་པས་དེང་སང་མན་ངག་རྣམས་ཕྱོགས་གཅིག་ཏུ་མཛད་པ་ཡིན་ནོ། །དེ་ལ་བཀའ་བབས་བཞིའི་གདམས་པ་རྗེས་འབྲང་གི་མཁས་གྲུབ་ངོར་པ་དང་རྫོང་པ་དང་གོང་དཀར་བ་ལས་བརྒྱུད་པ་དང༌། ཁའུ་བྲག་རྫོང་པ་ལས་བརྒྱུད་པའི་ལུགས་སྲོལ་གཉིས་ལས། ཕྱི་མའི་ནང་དུ་གོང་མ་གསུམ་ཡང་འདུས་པར་བཞེད་པའང་ལུགས་སྲོལ་འདི་ཉིད་ཀྱི་ཕྱོགས་ལ་སྐུ་དྲིན་གཞལ་དུ་མ་མཆིས་པའི་སྙན་བརྒྱུད་བསྟན་པའི་སྲོག་ཟུང་ས་ཆེན་པོར་གྱུར་པ་ཚར་ཆེན་རྡོ་རྗེ་འཆང་ཆེན་པོ་བློ་གསལ་རྒྱ་མཚོའི་ཞལ་སྔ་ནས། ཁྱད་པར་ནག་པོ་ཆེན་པོའི་མན་ངག་ནི། །བརྒྱུད་ལྡན་བླ་མ་བཅུ་ཕྲག་གཅིག་ལ་ཞུས། །འགྲན་ཟླ་ཀུན་བྲལ་དྲིན་ཅན་རྡོ་རིང་པའི། །སྙན་བརྒྱུད་ཟབ་མོ་བུམ་པ་གང་བྱོར་ཐོབ། །ཨེ་ཝཾ་པ་ནི་བསྡུས་ལ་སྤྲོས་པ་ཆུང༌། །མུས་སྲད་པ་ནི་དཀར་ཆག་ཁྲིགས་ཆགས་ཅན། །རྡོ་རྗེ་གདན་པ་འཆམ་དང་ནུས་པའི་བདག། ཁོ་བོས་ཐོབ་པའི་ཐུན་མོང་བརྒྱུད་པ་གསུམ། །ཞེས་སྔ་མ་གསུམ་པོ་ཐུན་