[A:19]zhig gang gis chags bral ba/ /bden gnyis mtshan nyid can de chos/ /chags bral nyid ni 'gog pa dang / /lam gyi bden pa dag gis bsdus/ /zhes so/ /lung gi chos kyi mtshan nyid ni/ rtogs pa dam pa'i chos brjod byar ston pa'i gsung rab de'o/ /dbye na gnyis/ spros pa las byung ba'i bag chags dang / rgyu mthun las byung ba'i mngon brjod do/ /dang po ni/ rta dang glang po la sogs pa'i gtam sna tshogs te 'khor ba dang chos mthun pas 'jig rten pa'i mngon brjod ces bya'o/ /gnyis pa ni/ gsung rab yan lag bcu gnyis te/ de'ang chos nyid dam chos dbyings rtogs par byed pa'i rgyu mthun las byung bas de skad ces bya ste/ mya ngan las 'das pa dang chos mthun pas 'jig rten las 'das pa'i mngon brjod ces bya'o/ /de skad du'ang / dbus mtha' las/ rgyu mthun don gyi mchog nyid dang / /zhes dang / myang 'das kyi mdo las/ chu bo chen po bzhi rgya mtshor babs 'bab gzhol ba de bzhin du/ chos thams cad mya ngan las 'das par babs 'bab gzhol lo zhes gsungs so/ /gnyis pa la gsum ste/ 'bras bu'i chos/ bsgrub pa'i chos/ bshad pa'i chos so/ /dang po ni 'gog pa ste/ sdug bsngal bdun zhi ba'i myang 'das so/ /de'ang skye ba/ rga ba/ 'chi ba/ phrad pa/ bral ba/ 'dod pa ma rnyed pa/ phung po'i sdug bsngal te bdun no/ /gnyis pa ni lam ste/ 'bras bu'i chos de thob par byed pa'i bslu med kyi yon tan phun sum tshogs pa'o/ /gsum pa ni/ lam gyi chos gsal bar byed pa ste/ de la dbye na