[A:20]gnyis/ bka' dang bstan bcos so/ /dang po ni/ lha'i bu rab gnas kyis zhus pa'i mdo las/ chos rnams thams cad bka' dang bstan bcos gnyis su 'dus/ /legs par gsungs dang de yi dgongs 'grel bcas/ /de yi dbang gis shAkya'i bstan pa ni/ /'jig rten khams 'dir yun ring gnas par 'gyur/ /zhes gsungs pa ltar/ bdag rkyen gyi gtso bo ston pa sangs rgyas bcom ldan 'das kyis legs par gsungs pa'i bka' lung gi tshogs dang / ston pa'i phrin las kyi rgyun dam pa 'jig rten gyi khams su yun ring du mi nub par rjes su skyong bar byed pa sprul pa'i skyes bu chen po rnams kyis bka'i don legs par bkral ba'i dgongs 'grel bstan bcos kyi tshogs chen po gnyis so/ /de dag gi rnam par gzhag pa la gnyis/ dang po bka'i rnam par gzhag pa la mtshan nyid/ sgra don/ dbye ba ste gsum las/ dang po ni/ brjod bya don dang ldan pa/ rjod byed kyi ngag tshig dri ma med pa/ byed las khams gsum gyi nyon mongs spong ba/ 'bras bu zhi ba'i phan yon ston par byed pa'i gsung rab de nyid de/ rgyud bla ma las/ gang zhig don ldan chos dang nyer 'brel zhing / /khams gsum kun nas nyon mongs spong byed gsung / /zhi ba'i phan yon ston par mdzad pa gang / /de ni drang srong gsung yin ldog pa gzhan/ /zhes so/ /gnyis pa ni/ su bha Shi ta zhes pa legs par gsungs pas na bka'o/ /ji ltar legs par gsungs na gsung dbyangs yan lag bcu tshan drug pas te/ 'phags pa byams pas/ bde gshegs gsung ni mtha' yas te/