[A:34]stong phrag bzhi'o/ /bya ba'i rgyud kyang stong phrag bzhi'o/ /spyod pa'i rgyud ni stong phrag brgyad do/ /gnyis ka'i rgyud la stong phrag drug go/ rnal 'byor gyi rgyud la ming stong phrag bcu gnyis so/ /de ltar na stong phrag sum cu rtsa bzhi'o/ /rgyas par byas na tshad med do zhes gsungs so/ /dpal bde mchog sdom pa 'byung ba las/ rnal 'byor rgyud rnams kyi ni tshad/ /bye ba phrag ni drug tu nges/ /de bzhin rnal 'byor ma rgyud grangs/ /bye ba phrag ni drug cu'i grangs/ /de bzhin pha rol phyin pa'i tshul/ /sa ya dang ni dung phyur lnga/ /theg chen las gzhan mdo sde rnams/ /dung phyur phrag brgyad gsungs pa yin/ /zhes gsungs te/ 'di rnams kyang rgyud dang mdo sde'i chos kyi rnam grangs su bstan pa yin gyi/ tshigs su bcad pa'i grangs su mi blta'o/ /ci'i phyir zhe na/ bya ba'i rgyud la stong phrag bzhi zhes 'byung yang don zhags kyi mdo kho na la'ang stong phrag brgyad/ de nyid 'dus pa stong phrag brgya pa la sogs pa re re la'ang tshigs su bcad pa'i grangs mang po yod pa'i phyir ro/ /drug pa bdag rkyen gyi sgo nas dbye na gsum ste/ zhal nas gsungs pa'i bka'/ byin gyis brlabs pa'i bka'/ rjes su gnang ba'i bka'o/ /dang po ni/ 'phags pa bskal pa bzang po dang shes rab kyi pha rol tu phyin pa sdud pa tshigs su bcad pa lta bu'o/ /gnyis pa la gsum ste/ skus byin gyis brlabs pa/ gsung gis byin gyis brlabs pa/ thugs kyis byin gyis brlabs pa'o/ /dang po ni phyogs bcu'i sangs rgyas rnams kyis phyag g.yas pa byang chub sems dpa' rdo rje snying po'i spyi bor