[A:35]bzhag pas des sa bcu pa gsungs pa lta bu'o/ /gnyis pa ni/ brgyad stong pa las/ rab 'byor byang chub sems dpa' rnams kyis pha rol tu phyin pa las brtsams te/ ji ltar byang chub sems dpa' rnams nges par 'byung bar 'gyur ba de ltar spobs pa skyed cig ces gsungs pas/ de la shes rab kyi pha rol tu phyin pa ston pa'i spobs pa byung ba lta bu'o/ /gsum pa la gsum ste/ thugs ting nge 'dzin gyis byin gyis brlabs pa/ thugs thugs rjes byin gyis brlabs pa/ thugs bden pa'i stobs kyis byin gyis brlabs pa ste gsum las/ dang po ni/ ston pa zab mo snang ba zhes bya ba'i ting nge 'dzin la mnyam par bzhag nas shA ri'i bu dang spyan ras gzigs 'dri ba dang lan ldon pa'i tshul gyis shes rab snying po gsungs pa lta bu'o/ /gnyis pa ni/ gnod sbyin la sogs pas smras pa'i sngags sangs rgyas kyis byin gyis brlabs pas dngos grub khyad par can sgrub nus pa lta bu'o/ /gsum pa ni/ sangs rgyas kyi mthus nam mkha' dang 'od zer dang rol mo dang ljon shing la sogs pa las chos kyi sgra 'byung ba lta bu'o/ /gsum pa ni/ snying rje padma dkar po las/ bka' bsdu ba'i tshe thog mar 'di skad bdag gis thos pa la sogs pas gleng slongs/ bar du mtshams sbyor gyi tshig chugs/ mtha' mar bcom ldan 'das kyis gsungs pa la mngon par bstod do zhes bya ba chugs shig ces rjes su gnang ba lta bu'o/ /de dag gis ni bka'i rnam par gzhag pa bstan zin to/ // /gnyis pa bstan bcos kyi rnam par gzhag pa