[A:468]pa rnams yin la/ sbyang tshul sbyang gzhi'i chos su snang ba thams cad sku gsum gyi lam du sgyur bar byed pa'i bskyed rdzogs kyi rnal 'byor nyams su blangs nas/ sbyangs 'bras mthar thug sku bzhi zung 'jug gi go 'phang mngon du byed pa/ thabs ting nge 'dzin gyi khyad par gong na med par spyod pa'i don du gsungs pa rnal 'byor bla na med pa ste/ de la dbye na/ tshul gsum mdzes par byed pa'i rgyan las/ rnal 'byor che la thabs shes gnyis med gsum/ /zhes thabs kyi rgyud bla na med pa dang / shes rab kyi rgyud bla na med pa dang / thabs dang shes rab gnyis su med pa'i rgyud bla na med pa gsum du phye ba'i khyad par yang / de nyid las/ de yi khyad par gleng gzhi'i yi ge dang / /bskyed rim lha dang rdzogs rim rnam pa gnyis/ rjes spyod rnam dag rgyud kyi gdul bya rnams/ /rim bzhin mang nyung pho mo thabs shes te/ /gang gang gtso che thabs dang shes rab ste/ /de de gnyis ka ldan na gnyis med rgyud/ /ces rags pa'i 'jog byed du gsungs shing / don la gsang ba 'dus pa sogs kyang gnyis su med pa nyid du byang chub sems dpa'i 'grel chen las bshad pa ltar nges dgos shing / 'dir 'jog byed de dag dang rjes su mthun par gtso bor pha rgyud dam thabs kyi rgyud de/ de la'ang zla gsang thig le'i rgyud las/ 'dod chags zhe sdang gti mug gis/ /rgyud kyang rnam pa gsum du 'gyur/ /zhes gsungs pa ltar gsum gyi/ dang por 'dod chags can gtso bor 'dul bar byed pa dpal gsang ba 'dus pa'i skor la/ mi bskyod pa'i rigs su gtogs pa dpal