[A:57]bslang ba lnga/ rigs pa bzhi/ mtha' drug tshul bzhi/ bshad pa gnyis/ slob ma brtag pa/ bden pa gnyis te rgyan bdun zhes bya ba'i bshad pa'i tshul de rnams kyang 'di dag gi nang du ma 'dus pa med par gsungs te/ de dag gis ni 'bras bu sngags kyi theg pa 'grel tshul spyi'i rnam par gzhag pa mdo tsam bstan nas/ bye brag tu ni rgyud sde rin po che so so'i rjes su 'brangs pa'i rnam par 'grel ba'i tshul mi 'dra ba ci rigs par 'byung ba rnams ni rgyud 'grel so so'i steng du rtogs par bya'o/ /gnyis pa bkral ba'i rgyud 'grel gyi bstan bcos dngos la gnyis te/ rgyud sde so sor 'grel ba'i bstan bcos dang / rgyud sde spyir 'grel ba'i bstan bcos so/ /dang po la bzhi las/ dang po bya rgyud phyogs kyi rgyud 'grel gyi bstan bcos ni/ bsam gtan phyi ma'i rim par phye ba rgya cher bshad pa sangs rgyas gsang bas mdzad pa/ dpung bzang gis zhus pa'i rgyud kyi tshig don bshad pa la sogs pa mang du bzhugs pa rnams so/ /gnyis pa spyod rgyud phyogs kyi rgyud 'grel bstan bcos ni/ rnam par snang mdzad mngon par rdzogs par byang chub pa'i rgyud kyi 'grel bshad slob dpon sangs rgyas gsang bas mdzad pa la sogs pa rnams so/ /gsum pa rnal 'byor rgyud phyogs kyi rgyud 'grel bstan bcos ni/ rtsa ba'i rgyud de nyid bsdus pa'i rgya cher bshad pa ko sa la'i rgyan slob dpon shAkya bshes gnyen gyis mdzad pa dang / de kho na nyid snang bar byed pa slob dpon kun dga' snying pos mdzad pa la sogs pa rnams so/ /bzhi pa rnal 'byor bla med