[A:58]rgyud phyogs kyi rgyud 'grel bstan bcos ni/ gnyis su med pa'i rgyud kyi rgyal po kye rdo rje rtsa ba'i rgyud kyi rgya cher 'grel pa byang chub sems dpa'i rdo rje snying pos mdzad pa dang / dka' 'grel padma can slob dpon mtsho skyes kyis mdzad pa dang / kau mU dI sbyangs dka' zla bas mdzad pa la sogs pa rnams dang / bshad pa'i rgyud rdo rje gur gyi dka' 'grel intra bhU tis mdzad pa dang / kha sbyor rgyud kyi 'grel pa man ngag gi snye ma zhes bya ba 'jigs med 'byung gnas sbas pas mdzad pa la sogs pa rnams dang / bsdus pa'i rgyud kyi rgyal po dus kyi 'khor lo'i 'grel pa dri ma med pa'i 'od spyan ras gzigs dbang phyug gis mdzad pa la sogs pa rnams so/ /shes rab kyi rgyud dam rnal 'byor gsang mtha'i rgyud phyogs kyi rgyud 'grel la mngon brjod 'bum pa las 'byung ba nyung ngu'i rgyud kyi don rnam par bshad pa byang chub sems dpa' phyag na rdo rjes mdzad pa dang / mkha' 'gro rgya mtsho'i rgyud kyi 'grel pa gru gzings slob dpon padma rdo rjes mdzad pa la sogs pa rnams so/ /rnal 'byor chen po thabs rgyud phyogs kyi rgyud 'grel la gsang ba 'dus pa 'phags pa'i lugs la/ sgron ma gsal bar byed pa zhes bya ba'i rgya cher bshad pa dang / sbyor ba yan lag drug pa'i 'grel pa slob dpon zla ba grags pas mdzad pa sogs dang / slob dpon sangs rgyas ye shes zhabs pa'i lugs la/ rgyud 'grel slob ma la phan pa zhes bya ba la rab tu zhi ba'i ye shes dang bi shwa na mi tras mdzad pa la sogs pa rnams so/ /gnyis pa ni/ rgyud sde gong 'og de dag las mchog dang thun mong gi dngos grub sgrub pa'i lhag pa'i lha mang du bstan pa rnams kyi sgrub pa'i thabs dang / dkyil 'khor gyi cho ga dang / smin byed dbang dang / grol byed lam gyi rim pa yan lag tu bcas pa zab cing rgya che ba'i tshogs dpag tu ma mchis pa bzhugs pa rnams so/ /'dir smras pa/ nyi ma'i rgyud 'khrungs rgyal ba'i 'dzum sgros dang / /gsang gsum byin rlabs rjes su gnang las skyes/ /legs gsungs mjal ba'i rab dga' rgyas pa'i gzugs/ /shong ba stong gsum snod 'di e ma yangs/ /sbrang rtsi'i rgyal mtshan 'dzum brgya mi bstsu zhing / /lhas rtsen go la'i khyim du mi rgyu bar/ /mdo sngags rgyal bstan nyin mor byed pa yis/ /yid srubs gnas su brnag dka'i mun pas gtibs/ /de mthus chos min smra ba'i sngo bsangs ma/ /pha mthar bgyid pa kho nas rta bdun pa'i/ /rjes su 'gro min mngon mtho nges legs kyi/ /lam kun ma bsgribs ston pa 'dis kyang ngo / /lta byed dbang po ya bral skyes bu yis/ /dpyad bya'i gzugs don phra zhib dpyod nus min/ /de bzhin dgongs 'grel med pa'i bka' gcig pus/ /thub pa'i dgongs don ji bzhin rtogs pa nyung / /legs par phye'o a sho ka'i 'dab ma/ /gong bur yur ba mtshar sdug rkang pa'i rtses/ /mtha' drug tshul bzhi'i lkog gyur rgyal ba'i bka'/ /dgongs 'grel mkhas pa'i bstan bcos phreng bas so/ /zhes dam pa'i chos thos pa'i yi ge don gnyer gdengs can rol pa'i chu gter las/ 'jug yul shes pa'i ched du bstan pa'i rnam par gzhag pa'i sarga ste dang po'o/ // /spyi don gnyis pa 'jug sgo