[A:545]bdag bande tshul khrims rin chen la stsal to/ // /gnyis pa ni/ de dag kun gyi rtsa bar gyur pa ston pa'i bka' lung rin po che gangs can pa'i brdar 'gyur ro cog gi skor las rang gi skal ba mchog gi snod du cha shas lhung ba ni/ spyir sangs rgyas bcom ldan 'das kyis legs par gsungs pa'i chos ni thog mtha' bar gsum du dge ba ste/ de'ang lha klu mi dang dri za la sogs pa'i gdul byar gyur pa'i 'gro ba rnams kyi khams dang bsam pa dang / bag la nyal ba la brten nas dbang por 'tsham pa'i drang nges kyi chos so so'i skad dang mthun par bka' stsal pa ni nam mkha'i pha mtha' bzhin rtogs par dka' bas nyan rang gi slob mi slob kyi 'phags pa rnams dang srid pa rgyun gyi tha ma'i byang chub sems dpa' rnams kyis kyang 'di tsam mo zhes tshad gzung bar mi nus na so so skye bo rnams kyi yul lta ga la zhig 'on te rgya mtsho chen po las chu thigs tsam zhig yul dbus 'gyur 'chang sogs su byang chub sems dpa'i dge 'dun dang 'phags pa dgra bcom pa rnams kyis bka' bsdu ba rim pa gsum mdzad/ 'dzam gling mdzes par byed pa'i rgyan drug mchog gnyis dang / mngon par rtogs pa'i yon tan gyi sa lam mthon por gshegs pa'i grub chen brgyad cu rtsa bzhi sogs skyes chen du mas 'thor ba sdud pa dang 'chad nyan gyis gtan la phab pa'i dam pa'i chos kyi bdud rtsi rin chen 'byung gnas chen po'i mched zlar 'phags pa'i yul du bzhugs pa las byang phyogs gangs ri'i rwa bas bskor ba'i sman ljongs 'dir mod rgyud chu klung gi rgyun ltar ji snyed cig nye bar