[A:573]chen grags pa/ bka' 'gyur pa shAkya rgyal mtshan/ thu btsun 'jigs med dpa' bo man 'bum gyi brgyud pa bzhin no/ /bsil ldan sman ljongs mkhas dang grub mchog rnams/ /ji snyed byon pas bkral ba'i bstan bcos dang / /rgyal ba'i bka' lung 'gyur ro cog gzhung las/ /sher phyin skor sogs thos pa'i rim pa'o/ /zhes dam pa'i chos thos pa'i yi ge don gnyer gdengs can rol pa'i chu gter las mkhas shing grub pa brnyes pa rnams kyi bstan bcos dang / shes rab kyi pha rol tu phyin pa'i skor yongs rdzogs sogs ston pa'i bka' lung rin po che kha shas thos pa'i sarga ste nyer brgyad pa'o/ // /spyi don bzhi pa thos bsam don yod ched du rang gzhan don gnyis ji ltar bsgrubs pa'i tshul ni/ de ltar gong du smos pa'i skyabs mchog bka' drin mtshungs bral de rnams las chos kyi bdud rtsi mang dag thos pa de nyid kyang tshe 'di'i grags 'dod sogs lhur blang gi bgyi ba ma yin par sbyor ba kun mkhyen shAkya'i sras kyi ring lugs 'di la gsang ba bsam mi khyab par/ 'jig rten sangs rgyas 'byung ba brgya lam ste/ /mi yi lus kyi tshogs kyi rnyed pa yin/ /kye ma dad pa dang ni chos nyan pa/ /'di 'dra bskal pa brgyar yang rnyed par dka'/ /zhes gsungs pa ltar bcos min gyi dad pa brtan pos kun nas bslang / dngos gzhi mchog gi rdo rje slob dpon de rnams sgo gsum gus pas gtsug tu bsten cing / skyes rabs las/ rab tu dma' ba'i stan la 'dug / dul ba'i dpal ni nye bar bzhag/ dga' dang ldan pas mig gis blta/