R795: གོང་དཀར་བླ་མ་འཕྲིན་ལས་རྣམ་རྒྱལ་གྱི་གསན་ཡིག

« Title Page

Pagination (Witness A): 266

Last Page »

[A:266]༼ཏ༽ ༈ བཀའ་འགྱུར་ལུང་གི་སྐོར་ནི།

ཆུ་འབྲུག་ལོ་ས་གའི་ཚེས་བཅོ་ལྔ་རང་ལོ་ཉེར་བརྒྱད་ལོན་ཚེ།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་ཤཱཀྱ་ཐུབ་པ་ཐུགས་རྗེའི་བདག་ཉིད་ཅན་གྱིས་ལེགས་པར་གསུངས་པའི་དམ་པའི་ཆོས་ནི་ཐོག་མཐའ་བར་གསུམ་དུ་དགེ་བ་སྟེ། དེའི་ཉན་ཐོས་དག་གི་ས་ཐོག་མར་དགེ་བ་ནི་འདི་ལྟ་སྟེ། ལུས་ཀྱི་ལེགས་པར་སྤྱོད་པ་དང༌། ངག་གི་ལེགས་པར་སྤྱོད་པ་དང༌། ཡིད་ཀྱི་ལེགས་པར་སྤྱོད་པའོ། །བར་དུ་དགེ་བ་ནི་ལྷག་པའི་ཚུལ་ཁྲིམས་དང༌། སེམས་དང་ཤེས་རབ་ལ་བསླབ་པའོ། །ཐ་མར་དགེ་བ་ནི། རྣམ་པར་ཐར་པའི་སྒོ་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའོ། །གཞན་ཡང་དང་པོར་དགེ་བ་ནི། དད་པ་དང༌། བརྩོན་འགྲུས་དང༌། བག་ཡོད་པའོ། །བར་དུ་དགེ་བ་ནི། དྲན་པ་དང༌། ཏིང་ངེ་འཛིན་དང༌། སེམས་རྩེ་གཅིག་པའོ། །ཐ་མར༴ ཤེས་རབ་དང་ལྷག་མཐོང་དང་ཡེ་ཤེས་སོ། །གཞན་ཡང་དང་པོར་དགེ་བ་ནི། སངས་རྒྱས་ལ་མི་ཕྱེད་པར་དང་བའོ། །བར༴ ཆོས་ལ༴ ཐ་མར༴ དགེ་འདུན་ལ་མི་ཕྱེད་པར་དང་བས་འབྲས་བུ་ཐོབ་པའོ། །གང་དང་པོར་དགེ་བ་ནི་གཞན་ལ་ཉན་པའོ། །བར༴ ཚུལ་བཞིན་ཡིད་ལ་བྱེད་པའོ། །ཐ་མར༴ འཕགས་པའི་ཡང་དག་པར་བལྟ་བའོ། །གང་ཐོག་མར༴ སྡུག་བསྔལ་ཡོངས་སུ་ཤེས་ཤིང་ཀུན་འབྱུང་བ་སྤོང་བའོ། །བར༴ ལམ་སྒོམ་པའོ། །ཐ༴ འགོག་པ་མངོན་སུམ་དུ་བྱེད་པ་སྟེ། འདི་དག་ནི་ཉོན་མོངས་རྣམས་ཀྱི་ཐོག་མར་ཡང་དགེ །བར༴ ཐ་མར་ཡང་དགེ་བའོ། །དེ་ལ་