[A:38]བསྡུས་གསུམ་བསྟན་པ་དང༌། ཟབ་འབྲིང་ཐ་གསུམ་བསྟན་པ་དང༌། དེ་དག་གི་རྒྱབ་རྟེན་བསྟན་པ། ཡི་གེ་ཞལ་འཕངས་བསྟན་པ་སྟེ་བཞི་ལས། དང་པོ་ལ་རྒྱས་འབྲིང་བསྡུས་གསུམ་བསྟན་པ་དངོས་དང༌། དེ་གསུམ་གའི་ཐུན་མོང་གི་ཆོས་བསྟན་པ་གཉིས་ལས། དང་པོ་ལ་རྒྱས་པ་འབྲིང་པོ་བསྡུས་པ་བསྟན་པ་སྟེ་གསུམ། དང་པོ་ལ། གཉག་མ་ཉིད་ཀྱི་སྟེང་དུ་འཆད་པ་གཙོ་ཆེ་བ་གསལ་བྱེད་ཉེར་གསུམ་བཤད་པ་དང༌། གུད་དུ་གསུངས་པ་དང་བཅས་པའི་འཕྲོས་དོན་བཅུ་བདུན་བཤད་པ་གཉིས། དང་པོ་ལ། འཁོར་འདས་ཐུན་མོང་གསལ་བྱེད་བཅུ་བདུན་བཤད། འཁོར་ལོ་འཆམ་པ་གསལ་བྱེད་གཉིས་བཤད། འཁོར་ལོ་བསྐོར་བ་གསལ་བྱེད་གསུམ་བཤད། ཐུན་མོང་དུ་གསལ་བྱེད་གཅིག་བཤད་པ་སྟེ་བཞི་ལས། དང་པོ་ལ། རྒྱུད་གསུམ་གསལ་བྱེད། ཚད་མ་གསལ་བྱེད། གདམས་ངག་གསལ་བྱེད། རྟེན་འབྲེལ་གསལ་བྱེད། བར་ཆད་བསྲུང་བ་གསལ་བྱེད་དེ་ལྔ། དང་པོ་ནི། ཀུན་གཞིའི་ཡིག་ཆུང༌། གདན་གྱི་ཡིག་ཆུང༌། ལུས་དཀྱིལ་ཡི་གེ །འཆི་ལྟས་བརྟག་པ་འཆི་བླུ་དང་བཅས་པ། སྣང་བ་བསྒྱུར་བའི་འདའ་ཁ་མ། གསང་དབང་གི་ཐིག་ལེའི་རྣལ་འབྱོར། ཤེས་རབ་ཡེ་ཤེས་ཀྱི་ཕྱག་རྒྱའི་མཚན་ཉིད། དབང་བཞི་པའི་ཕྱག་རྒྱ་ཆེན་པོ་ནས་འཕོ་བ། ཞར་བྱུང་བར་དོའི་ཡིག་ཆུང༌། ལམ་དབང་རྒྱས་པ་སྟེ་བཅུའོ། །གཉིས་པ་ནི། ཚད་མ་བཞིའི་ཡི་གེ །གསུམ་པ་ནི། གདམས་ངག་དྲུག་གི་ཡི་གེ །བཞི་པ་ནི། རྟེན་འབྲེལ་ལྔའི་ཡི་གེ །ལྔ་པ་ལ། གྲིབ་སེལ་སྦྱིན་སྲེག །གྲིབ་མ་ཁྲུས་དང་ཚ་ཚས་སེལ་བ། འཛག་པ་དྲུག་སེལ་བ། ཡིག་བརྒྱ་འདོན་ཐབས་ཏེ་བཞིའོ། །གཉིས་པ་འཁོར་ལོ་འཆམ་པ་ལ། རླུང་སྦྱོར་བདུན་གྱི་ཡི་གེ་དང༌། བྷ་གའི་ཡི་གེ་བཅུ་བཞི་གསལ་ན་གཉིས་སོ། །གསུམ་པ་འཁོར་ལོ་བསྐོར་བ་