[A:༡༡]ཅིག་བརྒྱབ་སྟེ་མགོ་བོ་སྙིང་གའི་བར་དུ་བཅིངས། རྣ་བ་ནས་བཟུང་ནས་སྤྱི་བོར་མཆོད་རྟེན་ཞིག་བཞག་སྟེ་རྣལ་འབྱོར་མ་རྣམས་ཀྱང་བརྒྱལ་བར་གྱུར་ཏོ། །དེ་ནས་བརྒྱལ་བ་སངས་པ་དང༌། རྣལ་འབྱོར་མ་རྣམས་ན་རེ། ཁྱེད་ནང་པ་སངས་རྒྱས་པ་སྙིང་རྗེ་ཆེ་བ་ཡིན་ན་འདི་ལྟ་བུ་བྱེད་པ་ཟེར་བ་ལ། སེམས་ཅན་བསད་པའི་ཤ་དང་ཁྲག་དྲོན་མོས་མཆོད་པ་མ་བྱེད་བྱས་པས། དེ་རྣམས་ཀྱིས་སློབ་དཔོན་གྱི་ཞབས་ལ་ཕྱག་འཚལ་ཞིང་སྐྱབས་སུ་སོང་ནས་སངས་རྒྱས་པའི་རྣལ་འབྱོར་མར་གྱུར་ཏོ། །དེའི་ཚེ་ཀོ་མཁན་དེ་རྒྱུད་བྱིན་གྱིས་བརླབས་ཤིང་གདམས་ངག་རྫོགས་པར་བསྟན་ནས་བདག་ཉིད་དང་ནུས་པ་མཉམ་པར་གྱུར་ནས། ཤར་ཕྱོགས་སུ་མུ་སྟེགས་ཀྱི་རྒྱལ་པོ་དེ་ཧ་ར་ཞེས་བྱ་བ་འདུལ་དུ་བཏང་ངོ༌། །དེའི་ཚེ་གྲུབ་ཐོབ་ཆེན་པོ་ནུས་པ་མཐར་ཐུག་པར་གྲགས་སོ། །ལྷོ་ཕྱོགས་ནས་འོངས་པའི་རལ་པ་ཅན་ཞིག་ཕྱིར་འབྲངས་ནས་འོངས་པ་དེ་དང་སློབ་དཔོན་དཔོན་གཡོག་གཉིས་ཀྱིས་ཁར་ས་པ་ཎིར་བྱོན་ནས་བསྐོར་བ་མང་དུ་མཛད་དེ། དང་པོ་རབ་ཏུ་བྱུང་བ་ནས་བཟུང་ནས་ས་ཧ་ཛ་དེ་ཝཱི་བཏུལ་བའི་བར་དུ་ངས་འདི་ལྟ་བུ་བྱས་ཞེས་ཐུགས་རྗེ་ཆེན་པོའི་སྤྱན་སྔར་སངས་རྒྱས་ཀྱི་བསྟན་པ་ལ་བྱ་བ་བྱས་པའི་རྟོགས་པ་ཕུལ་བ་དང༌། རིགས་ཀྱི་བུ་ཁྱོད་ཀྱི་ནུས་པས་ནི་རི་རབ་ཀྱང་ཐལ་བར་རློག་པར་ནུས་ཀྱི། སེམས་ཅན་ལས་སྣ་ཚོགས་པ་ཡིན་པས་སངས་རྒྱས་ཀྱིས་ཀྱང་གདུལ་བར་དཀའ་བའི་ཕྱིར་ཁྱོད་ཀྱིས་སེམས་ཅན་ལ་གནོད་པ་འདི་ལྟ་བུ་མ་བྱེད་པར་སྙིང་རྗེ་ཆེན་པོ་སྐྱེད་ཅིག་གསུང་ངོ༌། །དེ་ནས་སློབ་དཔོན་གྱིས་གཞན་མི་བྱེད། ནུབ་ཕྱོགས་ན་སོ་བ་ནཱ་ཐ་ན་རང་བྱུང་གི་རྡོ་ལ་དབང་ཕྱུག་ཆེན་པོའི་ལིངྒ་ཡོད་པ་དེ་ལ་དུས་རེ་ལ་ར་དང་མ་ཧེ་སྟོང་ཕྲག་རེ་རེ་བསད་ནས་མཆོད་པ་བྱེད་པས་སེམས་ཅན་དེ་རྣམས་ཀྱི་སྲོག་བསྐྱབ་པའི་ཕྱིར་དེ་འདུལ། དེ་ནས་ཐུགས་རྗེ་ཆེན་པོའི་བཀའ་བཞིན་བགྱིད་དོ་ཞེས་བརྗོད་པས། འོ་ན་རྟེན་མ་བཤིགས་པར་ཐབས་ལ་མཁས་པས་ཐུལ་གསུངས་ནས། དཔོན་