[A:༧] སངས་རྒྱས་པ་ཡིན་ན་ཝཱ་རཱ་ཎ་སཱིར་གནོད་པ་སྐྱེལ་ཉེན་ཡོད་པས་བསྐྲད་དགོས་པས་རྟོགས་ཤིག་ཟེར་ནས་ཀུན་རྟོག་ཏུ་བཅུག་པས་མ་རྟོགས་ནས། རྒྱལ་པོའི་དྲུང་དུ་ཁྲིད་ལ་ཤོག་ཟེར་ཏེ་ཁྲིད་ནས་འོངས་པའི་ལམ་དུ་འབུ་དང༌། ཕྱེ་མ་ལེབ་ལ་སོགས་པའི་སྲོག་ཆགས་མང་པོ་ཁར་བཅུག་ཀྱང་མི་རྣམས་ངན་པ་ངན་པ་ཟེར། ཁ་ནས་སྤུར་བས་ཀྱང་དེ་སྐད་ཟེར་བས། སློབ་དཔོན་གྱིས་སྲོག་ཆགས་མང་པོ་བསད་ཀྱང་ངན་པ་ངན་པ་ཟེར། སྲོག་ཆགས་མང་པོ་གསོས་ཀྱང་ངན་པ་ངན་པ་ཞེས། བདག་གི་སྤྱོད་པ་ཇི་ལྟར་བྱ་བ་མ་ཤེས་སོ་ཞེས་གསུངས་ཏེ། རྒྱལ་པོའི་དྲུང་དུ་བྱོན་པ་དང༌། རྒྱལ་པོས་གང་ཡིན་ཡང་དང་ཡང་དུ་དྲིས་པས། ལན་ཅི་ཡང་མ་བྱུང་བས། རྒྱལ་པོ་ན་རེ། འདི་ལ་དབང་ཕྱུག་ཆེན་པོའི་ཡོན་ཏན་ནམ་རྟགས་གང་ཡང་མི་འདུག་པས། རྐང་ལག་ལྕགས་སྒྲོག་གིས་སྡོམས་ལ་ཆུ་ལ་སྐྱུར་ཅིག་ཟེར་ནས། དེ་ལྟར་བྱས་ཏེ་བསྐྱུར་བས་ཡང་རྒྱལ་པོའི་དྲུང་དུ་བྱུང༌། ཡང་དང་ཡང་དུ་དེ་ལྟར་བྱས་པས་ལོག་གིན་བྱུང་སྟེ། དེ་ལྟ་བུའི་སྤྱོད་པས་འགྲོ་བ་རྣམས་རྡོ་རྗེའི་ཐེག་པ་ལ་བཀོད་དོ། །དེ་ནས་ལྷོ་ཕྱོགས་སུ་བི་མེ་ས་ར་འདུལ་དུ་གཤེགས་པའི་ལམ་ཁར་གངྒཱའི་འགྲམ་དུ་བྱོན་ཏེ་ཀོ་མཁན་ལ་སྒྲོལ་ཞེས་གསུངས་པས། རྔན་པ་སློངས་ཟེར་བས། ཁྱོད་ཚིམ་པར་བྱ་བའི་ཞེས་གསུངས་ཏེ། ཆུ་བོ་འདི་དོན་དུ་གཉེར་བ་ཡོད་དམ་མེད་ཅེས་དྲིས་པས། འདི་རེས་ཆེ་བར་དོན་དུ་གཉེར། རེས་ཆུང་བར་དོན་དུ་གཉེར་བས་ཆུང་བར་འདོད་ཅེས་བརྗོད་དོ། །དེ་ནས་སློབ་དཔོན་གྱིས་ཁྱོད་ལ་ཆུ་བོ་རང་སྦྱིན་གསུངས་ནས་སྡིགས་མཛུབ་མཛད་ནས་ཆུ་བོ་གྱེན་ལ་ལོག་པས། དེའི་ཚེ་གངྒཱའི་འགྲམ་ན་རྩྭ་ཁྱིམ་པ་མང་པོ་ཡོད་པ་དེ་རྣམས་ནུབ་ལ་ཁད་པར་སོང་བས་ཐམས་ཅད་འཇིགས་ཤིང་སྐྲག་པར་གྱུར་ཏེ། ཀོ་མཁན་གྱིས་འདིས་བྱས་ཞེས་བརྗོད་པས་ཐམས་ཅད་སྐྲག་ནས་ལ་ལས་ནི་ནོར་བུ། ལ་ལས་ནི་གསེར། ལ་ལས་ནི་དངུལ། ལ་ལས་ནི་བ་ལང༌། ལ་ལས་ནི་འབྲུ། ལ་ལས་ནི་མེ་ཏོག་གི་ཕྲེང་བ་ཕུལ་ཞིང་