[A:༢༩༦]ཚིག་གི་དོན་ལ་མཁས་པ་ཡི། །ངེས་པར་བྱིན་གྱིས་བརླབ་པར་བདག་གིས་ཤེས། །ཞེས་གསུངས་ཤིང་ཞལ་གྱིས་བཞེས་པ་ལགས་སོ། །
གཉིས་པ་བར་དུ་སྐྲ་དྲིན་ཆེ་བ་ཤོང་དཔང་ཡབ་སྲས་ཇི་ལྟར་བྱོན་པའི་ཚུལ་ནི། དེ་ཡང་ཐོག་མར་བདག་ཉིད་ཆེན་པོས་སྲོལ་ལེགས་པར་བཏོད་པ་དེ་ཉིད་རྒྱ་གར་གྱི་གཞུང་ཕལ་མོ་ཆེ་བསྒྱུར་བ་དང་། བཤད་པའི་རྒྱུན་ཆེས་ཆེར་དར་བར་མཛད་པ་པོ་ནི་ཤོང་དཔང་ཡབ་སྲས་རྣམས་ཡིན་པས་བོད་ལ་བཀའ་དྲིན་ཤིན་དུ་ཆེའོ། unaudited
དེ་ཡང་ཐོག་མར་ཤོང་ལོ་ཙཱ་བ་རྡོ་རྗེ་རྒྱལ་མཚན་ནི་ལ་སྟོད་ལྷོའི་དཔྱད་ལུང་ཤར་གྱི་བོང་ར་ཞེས་པར་སྐུ་འཁྲུངས། གཞོན་ནུ་ལ་རབ་ཏུ་བྱུང་། གོ་ཡུལ་བ་མདོ་སྡེ་དཔལ་རྒྱལ་མཚན་གྱི་དྲུང་དུ། དུས་འཁོར་ཆག་ལུགས། བདེ་ཀྱེ་ཕྲེང་བ་སྐོར་གསུམ་སོགས་མང་དུ་གསན་ཅིང་། གར་ཐིག་རྩིས་ལ་མཁས་པར་སྦྱངས། གཟའ་གསལ་བར་བྱེད་པའི་སྒྲོན་མེ་སོགས་རྩིས་ཀྱི་བསྟན་བཅོས་མང་དུ་མཛད། དེ་ནས་ཚ་ནར་སྲག་བདེ་བའི་དྲུང་དུ་ཕར་ཚད་མངོན་སུམ་ལ་མཁས་པར་སྦྱབས། དུས་འཁོར་གྱི་སྐོར་ཤོག་ལྡེབས་བཞི་བཅུ་ཙམ་ཕྱག་བྲིས་སུ་བྲིས་ནས་ཡོན་དུ་ཕུལ་ཏེ། འབྲོ་ལུགས་ཀྱི་དབང་རྒྱུད་བཤད་པ་མན་ངག་དང་བཅས་པ་གསན། འཕགས་པ་རིན་པོ་ཆེས་སྔ་རེས་ས་སྐྱར་བྱོན་པ་ན་བསྟོད་པའི་ཚིགས་སུ་བཅད་པ་སྤེལ་ལེགས་ཕུལ་ནས་ལོ་ཙཱ་སློབ་ཏུ་འགྲོ་བས་རྫོང་བར་ཞུ་ཞུས་པས། དེ་ལྟ་བུའི་བློ་སྐྱེ་བ་བཟང་། རེ་ཞིག་གཞུང་ལུགས་གསར་པ་བསྒྱུར་བའི་ནུས་པ་མ་བྱུང་ཡང་། །པཎྜི་ཏ་ལ་སློབ་གཉེར་དང་དྲི་གཏུགས་ལེགས་པར་གྱིས་ཤིག ཁོ་བོས་ཀྱང་ཆོས་རྗེ་པ་བརྟེན་ཡུན་ཐུངས་པས། སྡེབ་སྦྱོར་མེ་ཏོག་གི་ཆུན་པོ་དང་། ཚིག་གཏེར་སོགས་ཚུལ་བཞིན་མི་ཤེས་པར་