[A:12a - 13a]/ /brgya 'dra'i bla brang bcu gsum ste bzhi bcu rtsa bzhi/ de'i nang na'ang mchod cha rten gsum/ mchod rdzas phyi'i gser 'bum gser thog la sogs mtha' yas pa dkar chag chen mor shes so/ dper mtshon na/ gu rum dpe khang gcig po na po ti stong gsum brgya gsum bcu rtsa bzhi/ brgya dpe'i bka' 'gyur cha gcig sogs dang/ dbu rtse snying ma na hor gos kyi 'phan nag tu grags pa mi khur bcu gnyis/ gser phan chen mo sangs rgyas stong sku tshang ba hor gos las grub pa mi bco brgyad/ dar gyi bkris kha rings shar nub kyi bla brang so so nas skyong dar chen mo lnga bcu sogs brjod kyi mi lang ba dang/ ston pa mya ngan 'das nas lo gsum stong drug brgya gsum bcu'i steng du sleb 'di yan la me mo sbrul dmar ser can gyi lo yan gyi/ 'bras bu'i dus lnga brgya pa phrag gsum/ mngon par rtogs pa'i lnga brgya pa phrag gsum/ lung gi steng nas mngon pa'i lnga brgya/ mdo sde'i steng nas brgya dang gsum bcu song ngo// dpal ldan sa skya chu mo glang la btab nas me mo sbrul gyi lo 'di yan la lo bzhi brgya dang nyi shu rtsa lnga song ba yin/ byang ra sgreng btab nas lo bzhi brgya dang bzhi bcu zhe gcig/ gsang phu'i bshad grwa chen mo gtsug nas rngogs lo chen po 'khrungs pa nas lo bzhi brgya dang so dgu lon pa/ lha sa smon lam gtsugs nas brgyad bcu rtsa dgu lon pa/ e wam chos ldan btab nas drug bcu rtsa dgu/ na lenDa btab nas drug bcu rtsa gnyis lon pa yin no/ da dung yang dpal ldan sa skya pa'i bstan pa yun ring du gnas pa gyur cig/ 'dir ni gdung brgyud rin po che rnams kyi che ba'i rnam par thar pa mdo tsam smos pa yin la/ zhib tu rgyas pa ni/ rje btsun gong ma rnam gyi so so'i rnam thar pa dang/ gdung rabs kyi yi ge chen mo rnams las zhib tu rgyas par byos la mos pa chen po skyed par rigs so// rje btsun chen po sogs kyi 'phrin las mdzad pa mdo tsam brjod na ni/ dpal ldan sa skyar rje btsun grags pas rgyud sde gsungs pa dang/ rgya nag cong ta'i mkhar gyi yul ljongs su sku'i bkod pa cig char chos ston pa/ dpal ldan sa skya pa'i khyad chos yin/ hor sog gi dmag chen po 'ong ba'i 'brug sgra yis// bod khams sa gzhi 'dar ba'i 'jigs skrag las// myur du skyob pa'i 'phrin las mtha' yas pa'i// dpal ldan sa skya pa'i khyad chos yin// dbus gtsang dam pa chos kyi chol kha dang/ mdo khams gir gling rta'i chol kha dang/ rgya hor mi'i chol kha gsum dbang ba/ dpal ldan sa skya pa'i khyad chos yin/ rgya nag shar phyogs ri bo rtse lnga nas// bal po skyi rong mnga' ris ti se'i bar// dam pa chos kyi 'khor los bsgyur ba 'di// dpal ldan sa skya pa'i khyad chos yin// khri bskor bcu gsum phal cher rang rang gis// chos sde so so'i zhabs tog