[A:༤༡༢]ཤིང་བརྟུལ་ཞུགས་ཀྱི་སྤྱོད་པ་མཐར་ཕྱིན་པའི་རྫུ་འཕྲུལ་གྱིས་ནག་ཕྱོགས་ལ་དགའ་བའི་འབྱུང་པོ་གདུག་པ་ཅན་གྱི་ནུས་སྟོབས་ཕྲལ་ནས་ཡང་དག་པའི་ལམ་ལ་བཀོད་པ་སོགས་མཛད་པ་མཐའ་ཡས། རྡོ་རིང་རིན་པོ་ཆེའི་སྐྱེ་བརྒྱུད་གྲུབ་ཆེན་ལྭ་བ་པ་དང་འདི་ཉིད་དུས་མཚུངས་པ་ཡིན་ནམ་སྙམ་མོ།། ༈ གསུམ་པ་པཎ་ཆེན་དྷརྨ་པཱ་ལ་ནི། ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་གྱི་གསལ་སྣང་ལ་ཤར་བར་སོམ་ཉི་མི་མངའ་བས། རྒྱ་གར་ཤར་ཕྱོགས་སུ་སྐུ་འཁྲུངས་པའི་སློབ་དཔོན་དྷརྨ་པཱ་ལ་ཞེས་གནས་ལྔ་རིག་པ་མཐར་ཕྱིན་ཞིང་རླུང་སེམས་ལ་རང་དབང་དུ་གྱུར་པས་སྐུ་ཚེ་ལ་མངའ་བརྙེས་པ་ཞིག་བྱོན་པའི་ཚེ། རྡོ་རྗེ་གདན་གྱི་ཀ་བ་ནས་མགོན་པོའི་སྒྲུབ་སྐོར་སློབ་དཔོན་པདྨ་བཛྲ་གྱིས་སྤྱན་དྲངས་པ་རྒྱ་གར་དུ་བཀའ་གཏེར་གཉིས་སུ་གྲགས་པའི་གཏེར་མ་དེ་ཡིན་ཞིང༌། མན་ངག་རྣམས་སློབ་དཔོན་ཀླུ་སྒྲུབ་ལ་གསན། བཀའ་མི་ནུབ་པར་བྱ་བའི་ཕྱིར་དུ་པཎ་གྲུབ་དྷ་རྨ་པཱ་ལ་ལ་གནང་འདི་ཉིད་ཀྱིས་བལ་པོའི་རྟེན་ཁྱད་པར་ཅན་རྣམས་མཇལ་བར་བྱོན་པའི་ཚེ་ཚད་པའི་སྙུན་གྱིས་ཟིན་པར་གངས་རི་མཐོང་སར་ཕེབས་ན་ཕན་ཟེར་བར་བརྟེན་ཧ་ནུ་མནྠས་འཕངས་པའི་ཁ་བའི་དུམ་བུ་ལ་གངས་ཅན་དུ་གྲགས་པའི་མངའ་རིས་སྨད་ཀྱི་གངས་རི་དང༌། མཚོ་མ་ཕམ་པ་གཟིགས་སུ་བྱོན་པ་ན་ལྷ་བཙད་པོས་ཆོས་ལ་གུས་པའི་བཀུར་སྟི་ཆེར་མཛད། ཁྱད་པར་སྐད་གཉིས་སྨྲ་བ་རིན་ཅེན་བཟང་པོས་ཡོ་གའི་སྐོར་མང་དུ་གསན། མགོན་པོའི་སྒྲུབ་ཐབས་རྒྱ་གར་གྱི་གཏེར་མ་རྣམས་གསན་པས་ལོ་ཆེན་ནས་བརྒྱུད་པ་ལའང་བཀའ་གཏེར་ཟུང་དུ་འཇུག་ཅིང༌། ལས་མགོན་གྱི་སྐོར་ལྷ་བཙུན་བྱང་ཆུབ་འོད་ཀྱི་གཏེར་མ་