[A:༤༡༤]ངག་གི་བཀའ་བབས། ཟབ་ཆོས་འདི་ཉིད་བོད་དུ་དར་བའི་རྟེན་འབྲེལ་འགྲིག་ཚུལ་ནི་འབྲོག་མིའི་མནལ་ལམ་བཀའ་རྒྱ་མར། ལྷོ་ནས་མི་ནག་པོ་རི་བོ་ཙམ་པ་འཕུར་བྱུང་བའི་ཁ་ནས་དུང་གི་སེང་གེ་སྐྱུགས། དེའི་ཁ་ནས་གསེར་གྱི་རྡོ་རྗེ་བྱུང་བའི་ལྟེ་བ་ནས་བུམ་པ་ཆུས་གང་བ་ཐུགས་ཀར་ཐིམ་པའི་མནལ་ལམ་བྱུང་བའི་སང་ཉིན་སྒོར་ཨཱ་ཙརྻས་རྭ་དུང་བུས་བྱུང་བ་ན་ལྟར་བཏང་བས་ལྭ་བ་དམར་པོ་གྱོན་པ་ཞིག་གིས་ཁྱེད་ལ་བསྟད་ནས་འོངས་ཟེར་བ་ནང་དུ་བོས་ནས་གསུང་གླེང་མཛད་པར་རྒྱུད་སྡེ་རྒྱ་མཚོར་མཁས་ཤིང་ཁྱད་པར་རྣལ་འབྱོར་དབང་ཕྱུག་གི་གདམས་པ་ཡོད་པ་མཁྱེན་ནས་ཐོག་མར་ཚར་གསུམ་ཁུག་པའི་ཆོས་འབྲེལ་སོགས་གསན། ལོ་གསུམ་ནས་ཚུར་བོད་དུ་ཡོང༌། དེ་དུས་ཆོས་ཡོན་གསེར་སྲང་ལྔ་བརྒྱ་གྲབས་ཀྱིས་གསུང་བ་བཞིན་ཞལ་དན་མཛད། ལྷ་རྩེ་བྲག་ཏུ་བཞུགས་པའི་ཚེ་ཞལ་དན་བཞིན་པཎ་ཆེན་གྷ་ཡ་དྷ་ར་ཕེབས། པཎྜི་ཏའི་ཞལ་ནས་གསུང་ངག་འཛུགས་པ་ལ་གནས་ཁྱད་པར་ཅན་དགོས་གསུང་བ་ཆུ་ལ་མུ་གུ་ཞེས་པའི་སྒྲ་བྱུང་བ་གར་སོང་རྩད་བཅད་པ་མཐར་མུ་གུ་ལུང་དུ་ཐིམ་པས་རྣམ་པར་གྲོལ་བའི་སྒྲ་རྟེན་འབྲེལ་ལེགས་པར་དགོངས་ནས་དེར་གནས་མཛད། གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་པ་ལོ་གསུམ་ལ་རྫོགས་པར་གནང༌། པཎྜི་ཏ་འབྱོན་པར་བརྩམས་པ་ལ་སྔར་ཞལ་དན་བཞིན་ལོ་ལྔ་བཞུགས་པར་གསོལ་བས་ཆོས་ཚར་ནས་བསྡད་པར་དགོས་པ་མེད་གསེར་ཕྲི་ནས་ཕུལ་ཆོག་གསུང་ཡང་རྟེན་འབྲེལ་མི་ལེགས་དགོངས་ཏེ་གསེར་སྲང་ལ་བཏེག་པ་ཅུང་ཟད་མ་ལོངས་པར་ལྷ་རྗེ་ཟུར་ཕུ་ཆེ་ལ་གདམས་པ་ཡོད་བས་གསེར་ཁུར་ཤོག་གསུངས་པ་བཞིན་ཕུལ། པཎྜི་ཏར་གསེར་