[A:༤༢༤]དཔོན་སྲེགས་དུམ་པ་རས་པ། བཟང་ཡུལ་བ། ཁྲོ་ཕུ་བ། ས་སྐྱ་པ། སློབ་དཔོན་ཇོ་སྟན་མཁར་སྐྱ་བ་སོགས་ཡོངས་འཛིན་བཅུ་ལྷག་གི་ཞབས་པད་ཉེ་བར་བསྙེན་ཏེ་ཐེག་པ་ཆེ་ཆུང་གི་ཟབ་ཆོས་མང་དུ་གསན། བཅུ་དགུ་པར་མཁན་པོ་ཆོས་རྒྱལ་གྱི་དྲུང་དུ་བསྙེན་པར་རྫོགས། ཁྱད་པར་བླ་མ་རྔོག་སྟོན་ཞེས་ས་ལོ་དང་ཁྲོ་ལོ་ལ་དག་པ་མི་སྟེར་བ་སྐད་བྱེད་པ་དེ་ལ་ཀུན་ལས་བཏུས་པ་སོགས་ཞུས། ཁོང་མོས་པའི་བླ་མ་སངས་རྒྱས་གཉན་སྟོན་གྱི་དྲུང་དུ་བྱོན་པའི་ཚེ་བླ་མའི་ཞལ་ནས་དེ་རིང་རབ་གྲོང་ནས་སྒོམ་ཆེན་པ་ཞིག་འོང་བར་གདའ་བས་ཨྱོན་དང་ཛ་ལནྡྷ་ར་ཚུན་ཆོད་ནས་ཕྱིའི་རྒྱ་མཚོའི་མཐའ་ཚུན་འགེང་པའི་ཆོས་བདག་ཅིག་ཡིན་པས་ཕྱག་བདར་གྱིས་གསུངས། མཇལ་བའི་ཚེ་ཁྱོད་ངའི་རྩར་ལོ་གསུམ་གྱི་རིང་མ་ཐོན་པའི་གོང་ལ་ལུང་བསྟན་བྱེད་པའི་བླ་མ་རྔོག་སྟོན་གྲོང་ཨང་གསུངས་པས་མངོན་མཁྱེན་ཐོགས་མེད་དུ་དགོངས། ཁྱོད་འདིར་འོང་བའི་རྒྱུ་ཅི་ཡིན་གསུངས་པར་ཁྱེད་སྒྱུ་ལུས་རྨི་ལམ་འབྱོངས་ཤིང་འོད་གསལ་མངོན་དུ་གྱུར་པའི་ཡི་དམ་གྱི་ཞལ་གཟིགས་ཆོས་སྐྱོང་བྲན་དུ་འཁོལ་ཟེར་བས་འོངས་ལགས་པས་བླ་མ་ཤངས་པའི་གདམས་པ་རྣམས་གནང་འཚལ་ཞུས་པས་རྗེ་བཙུན་ནེ་གུ་མའི་ཐུགས་ཀྱི་ཉིང་ཁུ་ཆོས་དྲུག་གི་དབང་བྱིན་རླབས་མན་ངག་ལུང་རྒྱབ་རྟེན་མཐའ་དག་རྫོགས་པར་གནང་ནས་བརྒྱུད་པ་རིན་ཆེན་སྣ་བདུན་གྱི་ཐ་མ་ཡིན་ནོ་ཞེས་ངོས་འཛིན་མཛད། འགྲོ་དོན་འཕྲིན་ལས་ཀྱང་རྒྱ་ཆེར་བསྐྱངས་པས་ཤངས་པ་བཀའ་བརྒྱུད་ཀྱི་བསྟན་པའི་སྒྲོན་མེའོ།། ༈
བརྒྱད་པ་ཀུན་མཁྱེན་ཆོས་འོད་ནི། བོ་དོང་དུ་ཚར་ཆེན་ཕེབས་རྒྱུའི་དོ་ནུབ་རྗེ་མཁྱེན་བརྩེའི་མནལ་ལམ་དུ་ཀུན་