R88: རིགས་དང་དཀྱིལ་འཁོར་ཀུན་གྱི་ཁྱབ་བདག་རྡོ་རྗེ་འཆང་བློ་གསལ་རྒྱ་མཚོ་གྲགས་པ་རྒྱལ་མཚན་དཔལ་བཟང་པོའི་རྣམ་པར་ཐར་པ་སློབ་བཤད་བསྟན་པའི་ཉི་འོད།

  • Pagination (Witness A): ༤༢༩
[A:༤༢༩]བསོད་ནམས་བློ་གྲོས་དང་ཐུགས་སྲས་སེམས་དཔའ་ཆེན་པོ་སོགས་ཆེ་བཙུན་མཁས་གྲུབ་ཀྱི་སློབ་མ་ནམ་མཁའི་སྐར་ཚོགས་ལྟར་གྲངས་ཡས། སྒྲ་ཚད་པ་སོགས་ཞལ་སློབ་རྣམས་ལ་རྒྱལ་བ་གཉིས་པ་གཙོང་ཁ་པ་ཆེན་པོས་རྒྱུད་སྡེ་བཞི་ཕལ་ཆེར་གསན་ནས་དར་བས་མཉམ་མེད་རི་བོ་དགའ་ལྡན་པ་ཞེས་ཤར་ཕྱོགས་རྒྱ་མཚོའི་མཐའི་བར་དུ་ཁྱབ་པའང་འཕྲིན་ལས་ཀྱི་ཆ་ཤས་སུ་སེམས། རྡོ་རྗེའི་རྣལ་འབྱོར་གྱི་ལམ་ལ་བརྟེན་ནས་སྤངས་རྟོགས་ཀྱི་ཡོན་ཏན་ནི་བསམ་པའི་ར་བ་ལས་བརྒལ་ཞིང་བསྟན་འགྲོའི་དོན་རླབས་པོ་ཆེ་མཛད་བཞིན་པའི་ངང་ནས་ཤིང་འབྲུག་ཧོར་ཟླ་དྲུག་པའི་ཉེར་གཅིག་ལ་དགའ་ལྡན་གྱི་གནས་སུ་བྱམས་པའི་ཐུགས་ཀར་སྐུའི་བཀོད་པ་བསྡུས་སོ།། ༈ བཅུ་པ་རྣལ་འབྱོར་གྱི་དབང་ཕྱུག་ཡར་ཀླུངས་པ་ཆེན་པོ་ནི། འདར་དུ་ཞལ་གྱི་གཏོར་ཆེན་དུས་ཚར་ཆེན་གྱི་མནལ་ལམ་དུ་འཇམ་དབྱངས་སྒེག་པའི་ལོ་རྒྱུས་ཀྱིས་ངེས་པར་ནུས་པས་བོད་འདིར་མིའུ་གདུང་དྲུག་ཏུ་གྲགས་པའི་ནང་ཚན་ལྡོང་གི་རིགས་ལས་རྒྱལ་ཚ་ལུང་མང་པོ་ཆོས་ཀྱི་དབང་ཕྱུག་སོགས་དགེ་བའི་བཤེས་གཉེན་རིམ་པར་བྱོན་ནས་དཔལ་ལྡན་ས་སྐྱ་པའི་གདུང་བརྒྱུད་རྣམས་དང་བླ་རེས་སློབ་རེས་སུ་གྱུར་པའི་དཔོན་བརྒྱུད་དུ་ཤིང་ཕོ་སྤྲེའུའི་ལོ་ལ་སྐུ་བལྟམས། ཆུང་ངུའི་དུས་ནས་སྔོན་གྱི་བག་ཆགས་བཟང་པོའི་མཐུ་བརྟས་པས་ཡི་གེ་འདྲི་ཀློག་སོགས་ཚེགས་མེད་པར་མཁྱེན། ཁུ་སྟོན་སེང་གེ་བཟང་པོའི་དྲུང་དུ་དགེ་བསྙེན་གྱི་སྡོམ་པ་ནོས་མཚན་སེང་གེ་རྒྱལ་མཚན་དུ་གསོལ། ཀྱེ་རྡོར་གྱི་དཀྱིལ་འཁོར་དུ་སྨིན་པར་མཛད། སྐུ་ན་གཞོན་དུས་གཞུང་ལུགས་ལ་སྦྱངས་ཏེ་