[A:༤༣༤] ནང་རང་བྱུང་རྡོ་རྗེ་ལུས་ཀྱི་དཀྱིལ་འཁོར་དུ་རྩ་ཁམས་རླུང་གསུམ་ཐམས་ཅད་དག་པ་ཡེ་ཤེས་ཀྱི་ལྷ་བདེ་སྟོང་གི་རོལ་པར་འཆར་བ་སོགས་ཡོན་ཏན་ཕུན་སུམ་ཚོགས་པས་མ་དང་མཁའ་འགྲོའི་གཙོ་མོ་མཛད་པ་ཞིག་གོ །ཞི་བདེའི་པད་འདབ་འཇམ་མཉེན་མལ་སྟན་ལས། །སྲེད་བྲལ་སྣ་ཚོགས་འགྲོ་ཁམས་ཚེར་དོང་དུ། །ཉེར་འཇུག་སྙིང་རྗེའི་ཆ་གང་ཆུ་ཤེལ་དབང༌། །ལྷག་བསམ་རླུང་གིས་གདུལ་བྱའི་མཁའ་ལ་དྲངས། །ཐུགས་བསྐྱེད་ནམ་ཡང་མི་ཡོལ་རླབས་འཕྲེང་གིས། །གཞན་ཕན་གྲུ་གཟིངས་དལ་མེད་རྟག་གཡེང་བར། །རང་བདེར་གཅིག་ཏུ་གཞོལ་བའི་ཆུ་ལྷ་མོ། །ཁྲེལ་རྒོད་སོ་ཡི་ལྦུ་བ་འཁྲིགས་པ་བཞིན། །འདུས་གསུམ་བགྲོད་དཀའི་འཕྲང་ལས་སྒྲོལ་བའི་ས། །དྲུག་མནན་རིང་མིན་ཟུང་འཇུག་ཕྱག་རྒྱ་ཆེ། །བརྙེས་ཀྱང་ད་དུང་བསླབ་པའི་ཟོལ་སྦྱོར་གྱིས། །གཞན་འདྲིད་སྒྱུ་ཐབས་འདི་འདྲ་རིགས་སམ་ཅི། །སྣ་ཚོགས་སྤྲུལ་པའི་གསེར་ཞུན་ཉག་ཐག་ལ། །མཁས་བཙུན་བཟང་གྲུབ་རིན་ཅེན་བརྒྱུས་པའི་རྒྱན། །ལུང་རྟོགས་གོམ་སྟབས་ལྷོད་པོའི་ས་སྲུངས་ལུས། །མངོན་པར་སྤུད་ལས་གླང་པོ་ཕལ་གྱི་མིན། །ཀུན་དགའི་བདེ་བ་བསྐྱེད་ནུས་དྲི་ཞིམ་དང༌། །བཞོན་པའི་བསེར་བུ་ལྷོ་ཕྱོགས་ནགས་ཀྱི་ཀླུང༌། །ལན་བརྒྱར་མྱུལ་བའི་རེག་བྱས་བསྣུན་པའི་མོད། །གྱེན་དུ་ལྡང་བའི་བ་སྤུའི་རྩེ་མོ་རྩུབ།། ༈
བཅུ་གསུམ་པ་སྐུ་ཚེ་འདིའི་རྟོགས་པ་བརྗོད་པ་ལ་གང་དུ་བྱོན་པའི་ཡུལ་ནི། ཀྱེ་རྡོར་བཤད་རྒྱུད་རྀ་ཀི་ཨ་ར་ལིའི་རྒྱུད་ལས། རྡོ་རྗེ་འཛིན་པ་ཆེན་པོ་འགྲུབ་བྱེད་ས་བཅུ་གསུམ་པ་མངོན་དུ་བྱེད་པ་ལ་འཛམ་གླིང་ཆུང་ངུ་འདི་ས་བཅུ་གསུམ་པ་ཐོབ་བྱེད་ཀྱི་སྐབས་སུ་གསུངས་པས་གླིང་གཞན་ལས་ངོ་མཚར་