[A:༥༤] བསྟན་ནས་དག་པའི་ཞིང་སོ་སོར་གཤེགས་པའི་སྣང་བས་མཚོན་རྫུ་འཕྲུལ་རྡོ་རྗེའི་བཀོད་པ་ཟད་མི་ཤེས་པ་ལ་དབང་འབྱོར། སློབ་མ་ཡང་མཆོག་ཐོབ་པ་གསུམ་དང་། བཟོད་ཐོབ་པ་བདུན་སོགས་མཁས་གྲུབ་ནམ་མཁའི་མཐའ་དང་མཉམ་པ་བྱུང་། དེ་སྲས་ཀུན་དགའ་འབར། བསོད་ནམས་རྩེ་མོ། གྲགས་པ་རྒྱལ་མཚན། དཔལ་ཆེན་འོད་པོ་རྣམས་ལས། ཀུན་དགའ་འབར་རྒྱ་གར་དུ་གཤེགས། སློབ་དཔོན་རིན་པོ་ཆེ་བསོད་ནམས་རྩེ་མོ་ནི་འཕགས་ཡུལ་གྱི་ཆུ་བོ་གངྒཱ་ཚུན་ཆད་དུ་མཁས་པའི་གྲགས་པས་ཁྱབ། ཡེ་ཤེས་ཀྱི་ཌཱ་ཀི་མ་རྣམས་ཀྱིས་རྡོ་རྗེ་གདན་གྱི་སྒོ་གོང་དུ་མི་ཐུབ་ཟླ་བའི་རྣམ་འཕྲུལ་གནས་ལྔ་རིག་པའི་པཎྜི་ཏ་ཆེན་པོར་བསྔགས་པའི་ཡི་གེར་བཀོད། བཤད་སྒྲུབ་ཀྱི་ཕྲིན་ལས་བསམ་གྱིས་མི་ཁྱབ་པའི་ངང་འཇའ་ལུས་རྡོ་རྗེའི་གོ་འཕང་ཆེན་པོར་བྱོན། རྗེ་བཙུན་གྲགས་པ་རྒྱལ་མཚན་ནི། འཕགས་པ་འཇམ་དཔལ་དབྱངས་ཀྱིས་རྗེས་སུ་བཟུང་བས་སྡེ་སྣོད་དང་རྒྱུད་སྡེ་རབ་འབྱམས་ལ་མཁྱེན་པའི་གཏེར་མཛོད་གྲོལ། རྗེ་བཙུན་ས་སྐྱ་པས་འོད་གསལ་གྱི་ངང་དུ་ལམ་འབྲས་ཉེ་བརྒྱུད་ཀྱི་གདམས་པ་སྩལ་ཞིང་གྲུབ་པའི་གོ་འཕང་མཐོན་པོར་གཤེགས། མཁས་བཙུན་གྲུབ་པའི་ཡོན་ཏན་བསམ་གྱིས་མི་ཁྱབ་པས། མ་བྱོན་སངས་རྒྱས་གསུམ་པ་ཁ་ཆེ་པཎྜི་ཏ་ཤཱཀྱ་