[A:༥༦] མཐའ་དག་ལ་ཤིན་ཏུ་བྱང་ཞིང་འཇིག་རྟེན་པའི་ལྷ་ལས་དངོས་གྲུབ་ཀྱང་ཐོབ་པ་ཕྱི་རོལ་པའི་སྟོན་ཆེན་འཕྲོག་བྱེད་དགའ་བོ་སོགས་དྲུག་ལུང་དང་། རིགས་པ་དང་། ལྷག་པའི་ལྷས་རྗེས་སུ་བཟུང་བའི་མཐུས་བརྟུལ་ནས་ནང་པའི་བསྟན་པ་ལ་བཅུག་།མཐར་རྒྱ་ནག་གོ་དན་རྒྱལ་པོས་སྤྱན་དྲངས་ཏེ་བྱང་ཕྱོགས་སྤྲུལ་པ་སྡེའི་ལྷ་ཁང་དུ་ངོ་མཚར་བའི་རྣམ་འཕྲུལ་བསམ་གྱིས་མི་ཁྱབ་པས་གཟུགས་སྐུའི་བཀོད་པ་བསྡུས། ཟངས་ཚ་བསོད་ནམས་རྒྱལ་མཚན་ལ་སྲས་ཆོས་ཀྱི་རྒྱལ་པོ་འཕགས་པ་དང་། གྲུབ་པའི་དབང་ཕྱུག་འགྲོ་མགོན་ཕྱག་ན་གཉིས་འཁྲུངས་པ་ལས། ཆོས་རྒྱལ་འཕགས་པ་རིན་པོ་ཆེ་བློ་གྲོས་རྒྱལ་མཚན་ནི། ས་ཆེན་པོ་ལ་བཞུགས་པ་བྱང་ཆུབ་སེམས་དཔའ་བསམ་བཞིན་དུ་མིའི་སྲིད་པར་བཟུང་བས། ཐོག་མ་ནས་རིགས་དང་། བརྩེ་བ་དང་། བྱང་ཆུབ་སེམས་དཔའི་སྤྱོད་ཚུལ་སོགས་གཞན་ལས་ཆེས་ཁྱད་པར་དུ་གྱུར་པས། འཕགས་པ་ཞེས་པའི་མཚན་གྱི་མེ་ཏོག་ཕྱེ། རིག་པ་དང་གྲོལ་བའི་སྤོབས་པ་ཟད་མི་ཤེས་པའི་གཏེར་བརྡོལ། ཡན་ལག་ལྔ་མཚོན་རྣོན་པོས་སོ་སོར་ཕྲལ་བ་རྒྱལ་བ་རིགས་ལྔའི་བཀོད་པར་བསྟན་པ་སོགས་རྫུ་འཕྲུལ་གྱི་སྤྱོད་པ་དང་། སྐུ་གཟུང་ཐུགས་ཀྱི་མཛད་པ་ཕུན་སུམ་ཚོགས་པས་གདུག་ཅན་ཧོར་གྱི་རྒྱལ་པོའང་མི་ཕྱེད་