[A:115]བསྟན་པ་རིན་ཆེན་རྒྱས་མཛད་པ། །མཚན་ནས་ཤིན་ཏུ་བརྗོད་དཀའ་བའི། །དགེ་སློང་རྒྱལ་བའི་ཤེས་རབ་སྟེ། །སྒྲ་སྐད་ཚིག་ལ་ལེགས་བསླབས་པས། །པནྚི་ཏ་ནི་མང་དུ་བསྟེན། །དེ་ཡི་ཡོན་ཏན་དཔག་མེད་པས། །རྗེས་སུ་དྲན་ན་མཆི་མ་དཀུ། །བ་སྤུ་ལྡང་ཞིང་དང་བ་སྐྱེ། །སྐྱེས་མཆོག་དེ་དང་ཕྲད་པར་སྨོན། །དེ་ཡིས་དྷརྨ་པཱ་ལ་ཡི། །ཉམས་ལེན་བསླབས་ནས་ཕྱི་ནས་ནི། །ནེ་པ་ལ་ཡི་ཡུལ་གནས་པ། །ཚུལ་ཁྲིམས་ཤིན་ཏུ་གཅེས་མཛད་པ། །མཁས་པར་རབ་གྲགས་བྲམ་ཟེ་ཡི། །འདུལ་འཛིན་པྲེ་ཏ་ཀ་ར་ལ། །འདུལ་བའི་ཕྱག་ལེན་ཐམས་ཅད་བསླབས། །སྒྲུབ་བརྒྱུད་བླ་མ་རྣམ་པ་གཉིས། །བཤད་པའི་བརྒྱུད་པ་རྣམ་པ་གཉིས། །འཛམ་གླིང་གྲགས་པས་ཁྱབ་གྱུར་པ། །མཁས་པ་མང་ལས་བརྒྱུད་པ་ཅན། །ཛྙཱ་ན་ཤྲཱི་ཞེས་གྲགས་པ་ལས། །སོ་སོ་ཐར་དང་དེ་ཡི་འགྲེལ། །འདུལ་བ་བསྡུས་པ་ཞེས་བྱ་བ། །དགེ་སློང་རྒྱལ་བའི་ཤེས་རབ་ཀྱིས། །དེ་ལ་ཞུས་ནས་འགྱུར་ཡང་བཅོས། །གཞན་ཡང་དགེ་སློང་དེ་ཡིས་ནི། །སུམ་བརྒྱ་པ་དང་དེ་ཡི་འགྲེལ། །འོད་ལྡན་ཞེས་བྱའི་གཞུང་དེ་ནི། ཁ་ཆེའི་མཁས་པ་པནྚི་ཏ། །ཤྲཱི་སུ་བྷཱུ་ཏི་ཤཱནྟི་ལ། །དགེ་སློང་དགེ་བློས་བསྒྱུར་ནས་ནི། །མ་དག་ཆད་པ་ཐམས་ཅད་བཅོས། །ཡུལ་དབུས་དཔེ་དང་བསྟུན་བྱས་ཏེ། །ཐུགས་རྗེས་རྒྱུད་བརླན་ལྷ་ཡི་སྲས། །བྱང་ཆུབ་འོད་ཀྱི་ངོར་བཤད་མཛད། །སློབ་མ་ལ་ཕན་ཞེས་བྱ་བའི། །འགྲེལ་པ་དེས་བསྒྱུར་དེ་ཡིས་གསན། །དེ་མིང་ཁ་ཆེ་པཎ་ཆེན་གྲགས། །དགེ་ཚུལ་རྣམས་ཀྱི་ཀཱ་རི་ཀཱ། །ས་མནྟ་ཤྲཱི་ཛྙཱ་ན་ལ། །