[A:141]ན་ལ་ཡང་རྒྱུད་འདིའི་བཤད་པ་ཡོད་པར་མངོན་ནོ། །གཞན་ཡང་སློབ་དཔོན་སངས་རྒྱས་ཡེ་ཤེས་ཞབས་ཞེས་བྱ་བ་འདི། བི་མ་ལའི་སློབ་མ་གཉགས་ཛྙཱ་ན་ཀུ་མཱ་ར། དེའི་སློབ་མ་སོག་པོ་དཔལ་གྱི་ཡེ་ཤེས་ཏེ། དེའི་ཡང་སློབ་མ་ཡིན་པས་དེ་ལས་བརྒྱུད་པའི་སྒྱུ་འཕྲུལ་གྱི་བཤད་པ་ཡོད་དམ་སྙམ་མོ། །
སངས་རྒྱས་ཡེ་ཤེས་འདི་བྱོན་པའི་དུས་ཀྱང༌། ལ་ལས་ཁྲི་སྲོང་ལྡེ་བཙན་གྱི་དུས་དང༌། ལ་ལས་རལ་པ་ཅན་གྱི་དུས་དང༌། ལས་ལས་ཁྲི་བཀྲ་ཤིས་བརྩེགས་པ་དཔལ་གྱི་དུས་སུ་བྱུང་བར་སྨྲ་སྟེ། རལ་པ་ཅན་གྱི་རིང་ལ་བྱུང་ནས། ཁྲི་བཀྲ་ཤིས་བརྩེགས་པ་དཔལ་གྱི་བར་དུ་བཞུགས་པ་ནི་དོན་ལ་གནས་སོ། །འདི་ལ་ཐུགས་ཟིན་གྱི་སྲས་བཞི། སྲས་ཀྱི་དམ་པ་གཅིག་དང་ལྔ་བྱུང་བ་ལས། སྲས་བཞི་ནི་སོ་ཡེ་ཤེས་དབང་ཕྱུག དེ་ལ་ལྟ་བ་སྒང་དྲིལ་ཏེ་བཤད། པ་གོར་བློན་ཆེན་འཕགས་པ། དེ་ལ་འགྲེལ་ཊཱིཀ་དང་སྦྱར་ཏེ་བཤད། དན་ཡོན་ཏན་མཆོག དེ་ལ་སྟར་ཀ་སྒེགས་སེལ་གྱི་ཚུལ་དུ་བཤད། སྲུ་ལེགས་པའི་སྒྲོན་མ། དེ་ལ་ཚིག་གི་སྡེབ་སྦྱོར་ལེགས་པས་བཤད། སྲས་ཀྱི་དམ་པ་ཡོན་ཏན་རྒྱ་མཚོ་ལ་ལྟ་བ་སྒང་དྲིལ་ཏེ་བཤད། གབ་པ་མངོན་དུ་ཕྱུངས་ཏེ། མན་ངག་ཁོགས་ལྡེབས་སུ་བཤད། ཟབ་མོ་གསང་བ་ཁོང་ལྟོ་ལྟར་བཤད། སྟར་ཀ་གེགས་སེལ་གྱི་ཚུལ་ཏེ་བཞི་ཀ་བཤད་པས། ཆོས་སྐོར་ཐམས་ཅད་ཚང་བ་ཡོན་ཏན་རྒྱ་མཚོ་ཡིན་ནོ། །འདི་ལ་སྲས་ཡེ་ཤེས་རྒྱ་མཚོ་དང་པདྨ་དབང་རྒྱལ་གཉིས་འཁྲུངས། ཡེ་ཤེས་རྒྱ་མཚོའི་སྲས་ལྷ་རྗེ་ཧཱུཾ་ཆུང༌། འདིས་རྗེ་བཙུན་མི་ལ་ལ་དྲག་སྔགས་