[A:142]གསུངས། ཡོན་ཏན་རྒྱ་མཚོ་ཡབ་སྲས་ཀྱི་སློབ་མ་མྱང་ཤེས་རབ་མཆོག་ཡིན་ཏེ། དེས་དོག་ལ་གཤོངས་ཀྱི་གཙུག་ལག་ཁང་བཞེངས། བསྐྱེད་རྫོགས་གསུམ་ག་ལ་མཁས་པར་གྲགས། ཧ་འོ་རྒོལ་གྱི་བྲག་ལ་སྒྲུབ་པ་མཛད་པའི་ཚེ། ཕུར་པའི་དཀྱིལ་འཁོར་ཞལ་གཟིགས། བྲག་ལ་རྡོ་རྗེ་བརྒྱབ་པས་འཇིམ་པ་ལ་བརྒྱབ་པ་བཞིན་སོང་བ་ལ་སོགས་པ་གྲུབ་པ་བརྙེས་པའི་ལོ་རྒྱུས་མང་དུ་ཡོད་དོ། །དེའི་སློབ་མ་བླ་མའི་ཐུགས་ཟིན་ཅིང༌། བསྐྱེད་རྫོགས་གསུམ་ག་ལ་མཁས་པ་ཆོས་ལུང་གི་མྱང་ཡེ་ཤེས་འབྱུང་གནས་ཏེ། དེ་དག་ལས་བརྒྱུད་པ་ཕལ་ཆེར་ལ་རོང་ལུགས་ཞེས་ཟེར་ཞིང༌། གདུང་རུས་ལས་བཏགས་ཏེ་མྱང་ལུགས་ཞེས་ཀྱང་བྱའོ། །སྐབས་འདིར་སོའི་སློབ་མ་ངང་ཐུང་བྱང་ཆུབ་རྒྱལ་མཚན། ཀོང་བཙུན་ཤེས་རབ་ཡེ་ཤེས། ར་ཐུང་ཤེས་རབ་ཚུལ་ཁྲིམས་ཏེ་གསུམ་ཡིན་པ་ལ། བྲེང་ཆགས་སུ་བྱས་ནས་བླ་མའི་བརྒྱུད་པ་གཡུང་སྟོན་པས་འདྲེན་ཏེ། ཅུང་ཟད་ནོར་བ་འདྲའོ། །དེ་ལྟར་ན་ཡོན་ཏན་རྒྱ་མཚོ་ཡབ་སྲས་དང་སོ་ཡེ་ཤེས་དབང་ཕྱུག་གཉི་གའི་སློབ་མ་མྱང་ཤེར་མཆོག་ཡིན་ལ། དེས་མྱང་ཡེ་ཤེས་འབྱུང་གནས། དེའི་སློབ་མ་ཟུར་པོ་ཆེ་སྟེ། ཟུར་པོ་ཆེ་འདི་སྟོང་ཚབ་འཕགས་པ་རིན་པོ་ཆེའི་སློབ་མ་ཡིན་པས། སངས་རྒྱས་ཡེ་ཤེས་དང་ཟུར་པོ་ཆེའི་བར་ན་བླ་མ་གཅིག་གོ །
དེ་ལ་ཟུར་གྱི་གདུང་རབས་ནི། ལྷ་རྗེ་ཟུར་པོ་ཆེའི་མེས་པོ་ཟུར་ཤེས་རབ་འབྱུང་གནས། དེའི་སྲས་བཟངས་མིག་པོ་ཆེ། དེ་ལ་སྲས་ལྷ་རྗེ་