[A:189]གེ་གཉིས་གྱིས་གཙང་ནག་འོད་འབར་ལ་གསུངས། དེ་ལ་མེས་སྟོན་མགོན་པོས་གསན། དེ་ལ་བླ་མ་སྲོས་གསན། དེ་ལ་པ་ཤཱི་ཤཱཀ་འོད་དང༌། རྟ་ནག་བདུད་འདུལ་གྱིས་གསན། པ་ཤཱི་ཟེར་བའི་རྒྱུ་མཚན་ནི། གོང་མ་སེ་ཆེན་གྱི་ལུང་གིས། བྲག་རྡོ་རྗེ་ཚེ་བརྟན་ནས་སློབ་དཔོན་པདྨས་སྦས་པའི་ཚེ་ཆུ་བཏོན། གསེར་ཡིག་པ་ལ་བསྐུར་བས། གོང་མའི་བླ་མ་རྣམས་དང་བྱས་པ་མཉམ་པའི་ཕྱིར་ཤཱིར་བཏགས་ཞེས་ཟེར། རྟ་ནག་བདུད་འདུལ་མ་མདའ་ཤཱཀྱ་འཕེལ་གྱིས་གསན། དེ་ལ་ཟུར་བྱམས་པ་སེང་གེས་གསན་ཏེ། དེ་ནི་སྐུ་ན་གཞོན་ནུ་ཉིད་ནས་ཐུགས་རབ་དང་མཁྱེན་པའི་རྩལ་ཤིན་ཏུ་ཆེ་ཞིང༌། ཁྱད་པར་དུ་སྒྱུ་འཕྲུལ་ལ་མཁས་པ་ཞིག་སྟེ་དགུང་ལོ་ཉི་ཤུ་རྩ་བདུན་ལ་གཤེགས། དེ་ལ་གཡུང་སྟོན་པ་དང༌། འཇམ་དབྱངས་བསམ་འགྲུབ་རྡོ་རྗེ་གཉིས་ཀྱིས་གསན་ཏེ།
xv.
དེ་ལ་གཡུང་སྟོན་པའི་གདུང་རུས་གླན་ཡིན་ལ། འཁྲུངས་ས་ནི་ཚོང་འདུས་པ་ཡིན། གཞོན་ནུ་ནས་མཁྱེན་པ་ཤིན་ཏུ་ཆེ། སྔགས་གསར་རྙིང་དང༌། མཚན་ཉིད་ཀྱིའང་མངོན་པ་ཀུན་ལས་བཏུས་ལ་མཁས། ཟུར་བྱམས་པ་སེང་གེས་ཤངས་པ་ཤཱཀ་འབུམ་ལ་གཤིན་རྗེའི་སྐོར་གསན་པའི་ཕྱགས་ཕྱིར་བྱོན་ནས། བླ་མ་དང་ལྷན་ཅིག་ཏུ་ལེགས་པར་བསླབས་པས། འཁྲུལ་འཁོར་ལས་སྦྱོར་སོགས་ལ་ཤིན་ཏུ་མཁས་ཤིང་མཐུ་ཆེ། གཞོན་དུས་སུ་གོང་མའི་ལུང་གིས་རྒྱ་ཡུལ་དུ་བྱོན། འཆམས་ལ་སོགས་པའི་རྣམ་འགྱུར་དང༌། གོང་མ་ལ་འབྲུ་འདབ་དགོས་པའི་མི་སྡེ་མང་པོས་ཐན་པ་བྱུང་བའི་ཚེ། གོང་མ་ལ་ཆར་འབེབ་པ་རྫོངས་བ་ཞུ་བ་བྱས།