[A:204]པར་གྲགས། འདི་ལྟར་དགུང་ལོ་བཅུ་གཅིག་པ་ལ་མཚན་ཉིད་གསན། བཅུ་གསུམ་མན་ཆད་ལ་གསན་པ་རྫོགས་པ་དང་འདྲ་བར་མཁྱེན་པ་ཆེ་བར་གྱུར། ཤེས་བྱ་ཐམས་ཅད་ལ་མ་རྨོངས་ཞེས་གྲགས་སོ། ཁོང་ཉིད་ཀྱི་ཞལ་ནས་བདག་ཐོས་པ་ཆུང་བ་ཡང་མིན་ཏེ། ཆོས་ཐམས་ཅད་ལ་མ་ཐོས་པ་མེད་དོ། ཐོས་པ་ཆེ་བ་ཡང་མིན་ཏེ། ཆོས་ཕལ་ཆེ་བ་ལ་ཚར་རེ་ལས་མ་དགོས་སོ་ཞེས་གསུངས་སྐད་དོ། །སྐྱེས་བུ་དེ་ནི་ཤེས་རབ་ཟབ་ལ་རྒྱ་ཆེ་བ་དྲི་མ་མེད་པ་དང་ལྡན་པས། རྒྱ་གར་གྱི་ཆོས་བཟང་པོ་མདོ་རྒྱུད་དམ་བསྟན་བཅོས་སུ་གཏོགས་པ་སྔར་མ་གཟིགས་པ་མཐའ་དག་ལ་ཚར་རེ་རེ་གཉིས་གཟིགས་པས་མཁྱེན་ཅིང༌། ཚིག་དང་དོན་མ་ལུས་པ་ཐུགས་ལ་ཟིན་ཅིང་ཐམས་ཅད་མི་བརྗེད་པའི་གཟུངས་ཐོབ་ཅེས་གྲགས་སོ། །གཞན་ཡང་ཙ་ན་ཀ་ལ་སོགས་པ་འཇིག་རྟེན་ལུགས་ཀྱི་བསྟན་བཅོས་དང༌། ཚད་མའི་བསྟན་བཅོས་དང༌། རིག་བྱེད་ཀྱི་བསྟན་བཅོས་དང༌། དོན་དུ་འགྱུར་བའི་ཚིགས་བཅད་དང༌། སྙན་དངགས་མང་པོ་མཁྱེན་པ་ཡིན། ཐུགས་ཀྱང་ཤིན་ཏུ་ཆེ་བས་ཆོས་ལ་མོས་པའི་མི་རྣམས་དང༌། ཆོས་ཀྱི་གང་ཟག་དང༌། ཁྱད་པར་དུ་རྡོ་རྗེའི་ཐེག་པ་ལ་ཞུགས་པ་དང༌། གསང་སྔགས་ཀྱི་ལས་དང་དངོས་གྲུབ་སྒྲུབ་པར་འདོད་པའི་གང་ཟག་དགེ་བ་ཅན་རྣམས་ལ་ཕན་གདགས་པའི་དགོངས་པ་བཟང་པོ་མངའ་བས། ཕྱི་ཅི་མ་ལོག་པའི་གདམས་པས་ནན་ཏན་དུ་ཕན་ཐོགས་པར་མཛད་པ། མངོན་པར་ཤེས་པའི་ཆ་དང་ལྡན་ཞིང་སེམས་ཅན་འདུལ་བའི་དུས་དང་ཚད་ལ་མཁས་པས། འགྲོ་བ་ཕལ་པ་དང་ཆོས་