[A:215]སློབ་མ་མཁས་པ་ཆེན་པོའོ།
།བཻ་རོས་ཁམས་སུ་སྔ་ཕྱི་རིམ་པ་གསུམ་དུ་བཤད་པར་གྲགས་ཏེ་དང་པོ་རྒྱལ་མོ་རོང་གི་བྲག་ལ་མགོན་པོའི་དགོན་པར་རྒྱལ་མོ་གཡུ་སྒྲ་སྙིང་པོ་ལ་གསུངས་པ་དང༌། ཚ་བ་རོང་གི་སྟག་རྩེ་མཁར་གྱི་དགོན་པར་གསང་སྟོན་ཡེ་ཤེས་བླ་མ་ལ་གསུངས་པ་དང༌། སྟོང་ཁུང་རོང་གི་བྲག་དམར་རྫོང་གི་དགོན་པར་སྤངས་སངས་རྒྱས་མགོན་པོ་ལ་གསུངས་པ་དང༌། སྔར་རྒྱལ་པོ་ལ་གསུངས་པ་དང༌། ཕྱིས་དབུས་སུ་བྱོན་ནས་དགེ་སློང་མ་ལ་ཟི་ཤེས་རབ་སྒྲོན་མ་ལ་གསུངས་པ་དང་རིམ་པ་ལྔར་གྲགས་ཏེ།
དེ་རྣམས་གཉགས་ཛྙཱ་ནས་བཻ་རོ་ཉིད་དང་གཡུ་སྒྲ་ལ་གསན་ཞིང༌། ཕྱི་འགྱུར་རྣམས་བི་མ་ལ་གསན་ནོ། །དེ་ལ་གཉགས་ནི། ཡར་ཀླུངས་གཉགས་ཀྱི་སྟག་སྒྲ་ལྷ་སྣང་དང༌། སྲུ་གཟའ་སྒྲོན་མ་སྐྱིད་གཉིས་ཀྱི་སྲས་སུ་འཁྲུངས། བི་མ་ལ་དང་གཡུ་སྒྲ་སྙིང་པོ་ལ་སོགས་པ་ལས་མཁྱེན་པ་ཆེ་ཞིང༌། བཀའི་ཆུ་བོ་ཆེན་པོ་བཞི་འདུས་པ་ཡིན་ཏེ། དཀྱུས་བཤད་གཞུང་གི་ཆུ་བོ་འགྲེལ་ཊི་ཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནད་ཡིག་དམར་ཁྲིད་དང་བཅས་པ། བྱིན་རླབས་དབང་གི་ཆུ་བོ་བསྐུར་ཐབས་ངོ་སྤྲོད་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་བསྲུངས་དྲག་སྔགས་དང་བཅས་པའོ། །དེས་སོག་པོ་དཔལ་གྱི་ཡེ་ཤེས། གྲ་དཔལ་གྱི་སྙིང་པོ། ལྷ་ལུང་དཔལ་གྱི་རྡོ་རྗེ། འོ་ཕྲན་དཔལ་གྱི་གཞོན་ནུ། སྙན་དཔལ་དབྱངས། འཚུར་ནག་ཡེ་ཤེས་དཔལ། ཨུ་པ་དེ་གསལ། ཐང་པ་ཟངས་དཔལ་གྱི་རྡོ་རྗེ། དགྱེ་འཕགས་པ་ཤེས་རབ། བྷུ་སུ་ཀུ་མཆོག་གི་བྱང་ཆུབ་རྣམས་ལ་