[A:216]གནང་ནས་སོག་པོས་སངས་རྒྱས་ཡེ་ཤེས་ལ་རིམ་པར་བརྒྱུད་པ་སྟེ། ལུགས་གཅིག་གོ
འདིའི་སྤངས་སངས་རྒྱས་མགོན་པོ་ནི། རྡོ་རྗེ་ཟམ་པ་བ་དག་གི་སྤངས་མི་ཕམ་མགོན་པོ་དང་གཅིག་པ་འདྲའོ།
ཡང་བརྒྱུད་པ་གཞན་རྩད་ཚ་ཤཱཀ་རྡོར་གྱིས་བཤད་པ་ནི། སྤངས་ཀྱིས་སྦ་རཀྵི་ཏ་ལ་བཤད། དེས་ཡ་ཟི་དར་མ་ཤེས་རབ། ཟེར་མོ་དགེ་སློང་མ་བདེ་གནས་མ་ལ་བཤད། རྗེས་མར་པ་ཤེས་རབ་འོད་པས། དེས་ལྷ་རྗེ་ཅན་བཀའ་དྲིན་ནོད་དུ་འོངས་པས། དེར་བསྙུན་དྲག་པོ་ཅིག་བྱུང་བ་ཤངས་ཀྱི་ལང་ཟ་སྟོན་པ་དར་མ་བསོད་ནམས་ཀྱིས་བཅོས་པས། དེའི་ལན་དུ་རྡོ་རྗེ་མེ་ལོང་དང༌། ལམ་རྣམ་བཀོད་དང༌། ཟབ་མོ་དབང་གི་མན་ངག་རྣམས་དང༌། མདོའི་འགྲེལ་པ་ལུང་བསྟན་རྡོ་རྗེ་དང༌། སེམས་ཕྱོགས་ཀྱི་ཆོས་སྐོར་མ་ལུས་པ་རྣམས་གནང༌། དེས་སྒྲོ་སྦུག་པ་ལ་གནང༌། དེས་ཤཱཀྱ་རྡོ་རྗེ་ལ་གནང་ངོ༌།
ཡང་ཡི་གེ་གཞན་ན། བི་མ་ལ་ཉིད་ཀྱིས་ཐལ་བ་ལ་སོགས་པའི་སྒྱུ་འཕྲུལ་གྱི་བཤད་རྒྱུད་རྣམས་ཇོ་མོ་སྒྲེ་མོ་ལ་གནང༌། དེས་མར་པ་ཤེས་རབ་འོད་ལ་གནང༌། དེས་ལངས་སྟོན་ལ་གནང་ཟེར་བ་འདུག་སྟེ། དེ་ལྟ་ན་ཇོ་མོ་ཟེར་མོ་དང་སྒྲེ་མོ་གཉིས་དོན་གཅིག་པ་འདྲའོ།
།འདི་དག་རྨོངས་པ་ཆོས་ལ་ལོག་པར་རྟོག་པ་དག་གི་སྡིག་པ་ཆེན་པོ་བསལ་བའི་སླད་དུ། བླ་མ་བརྒྱུད་པའི་ཡོན་ཏན་དང་ལྡན་པའི་ཕྱོགས་ཙམ་བརྗོད་པ་སྟེ། བདག་ཉིད་ཀྱིས་ནི། གསང་བདག་མདའ་ཚ་ཧོར་པོ་ནས་འགྲོ་མགོན་དམ་པ་ཤཱཀྱ་རྒྱལ། མཁས་པ་ལྕེ་སྟོན་ཡབ་སྲས། བླ་མ་ཐང་སྟོན་འབུམ་མེ། ཆོས་རྗེ་བླ་སྐྱབས་རྡོ་རྗེ།