[A:765]ཡར་བྱོན་གྱིས་ཀྱང་མཐའ་དབུས་ལེགས་པར་གཟིགས་ནས་དབོན་པོ་གཉིས་ཀ་ལ་གདན་སའི་ཞལ་བརྡ་གནང་བ་ཡིན་ནམ་སྙམ་མོ། །རང་ལོ་བཞི་བཅུ་རྩ་དྲུག་པ་མེ་ཕོ་སྤྲེའུ་ལ་གཤེགས། དོ་པ་དར་མ་ཤེས་རབ་ནི། སངས་རྒྱས་ཡར་བྱོན་གྱི་ལོ་ཉེར་དྲུག་པ་ས་ཕོ་བྱི་བ་ལ་འགོད་དེ་དོར་རར་འཁྲུངས། སངས་རྒྱས་ཡར་བྱོན་གྱི་ཞབས་ལ་གཏུགས་ནས་གདམས་པ་རྣམས་གསན། ཁོ་རང་གི་གསུང་ལས་སངས་རྒྱས་ཡར་བྱོན་ཨི་ནྡྲ་བུདྡྷིར་གྱུར་པའི་དུས་ནས་མཇལ་ནས་སྐྱེ་བ་མང་པོར་རྗེས་སུ་གཟུང༌། ད་ལན་བཀའ་དྲིན་རྫོགས་པར་ཐོབ་ཅེས་གསུང༌། དྲུག་ཅུ་རྩ་གཅིག་ལ་སྐོང་དགོན་བཏབ། རང་ལོ་བརྒྱད་ཅུ་རྩ་གསུམ་ལ་གཤེགས། འདི་ཡང་ཕྱག་རྒྱ་ཆེན་པོའི་ལམ་ལ་མངའ་བརྙེས་པ། བཀའ་ལུང་ཙམ་གྱི་ཆོས་སྐྱོང་བསྐུལ་བར་ནུས་པས། ཨ་ཙ་ར་པ་ཤིས་འདམ་དུ་སླེབ། རྟ་གཡོག་བསྐུལ་བ་ལ་སྤྲེའུ་མང་པོའི་རྟ་གཡོག་བཀྱེ། དང་པོར་དབོན་པོ་ཁོ་ན་ལ་དད་པས་འབུལ་བ་རྣམས་ཀྱང་རི་བོ་ཆེར་སྐྱེལ། མངྒ་ལ་གུ་རུ་ལ་ཅུང་མི་དད། ཕྱིས་འདི་ཡང་གྲུབ་ཐོབ་ཏུ་འདུག་གསུང་ནས་འབུལ་བ་སྔ་ཕྱི་མང་དུ་མཛད་དོ། །དེའི་དབོན་པོ་མངྒ་ལ་རཏྣ། དེ་རྗེས་མཉམ་མེད་གྲགས་པ་རྒྱལ་པོ། སྐྱེས་མཆོག་ནམ་མཁའ་སྙིང་པོ། ནམ་མཁའ་དཔལ་བརྩེགས་རྒྱལ་པོ། །དཔལ་བརྩེགས་རྒྱ་མཚོ། དཔལ་བརྩེགས་བཟང་པོ་རྣམས་གདན་སའི་རིམ་པའོ། །སྟག་ལུང་པ་སློབ་མ་དང་བཅས་པའི་སྐབས་སོ།། །།