[A:765]yar byon gyis kyang mtha' dbus legs par gzigs nas dbon po gnyis ka la gdan sa'i zhal brda gnang ba yin nam snyam mo/ /rang lo bzhi bcu rtsa drug pa me pho spre'u la gshegs/ do pa dar ma shes rab ni/ sangs rgyas yar byon gyi lo nyer drug pa sa pho byi ba la 'god de dor rar 'khrungs/ sangs rgyas yar byon gyi zhabs la gtugs nas gdams pa rnams gsan/ kho rang gi gsung las sangs rgyas yar byon i ndra buddhir gyur pa'i dus nas mjal nas skye ba mang por rjes su gzung / da lan bka' drin rdzogs par thob ces gsung / drug cu rtsa gcig la skong dgon btab/ rang lo brgyad cu rtsa gsum la gshegs/ 'di yang phyag rgya chen po'i lam la mnga' brnyes pa/ bka' lung tsam gyi chos skyong bskul bar nus pas/ a tsa ra pa shis 'dam du sleb/ rta g.yog bskul ba la spre'u mang po'i rta g.yog bkye/ dang por dbon po kho na la dad pas 'bul ba rnams kyang ri bo cher skyel/ mangga la gu ru la cung mi dad/ phyis 'di yang grub thob tu 'dug gsung nas 'bul ba snga phyi mang du mdzad do/ /de'i dbon po mangga la ratna/ de rjes mnyam med grags pa rgyal po/ skyes mchog nam mkha' snying po/ nam mkha' dpal brtsegs rgyal po/ /dpal brtsegs rgya mtsho/ dpal brtsegs bzang po rnams gdan sa'i rim pa'o/ /stag lung pa slob ma dang bcas pa'i skabs so// //